മഴ കളിച്ചു, അയർലൻഡിന്റെ നേരിട്ടുള്ള ലോകകപ്പ് യോ​ഗ്യത ഒഴുകിപ്പോയി!

ഡബ്ലിൻ: അടുത്ത വർഷം അരങ്ങേറുന്ന ഐസിസി ഏകദിന ലോകകപ്പ് പോരാട്ടത്തിനു നേരിട്ടു യോ​ഗ്യത നേടാനുള്ള അയർലൻ‍ഡിന്റെ മോഹം മഴയിൽ ഒഴുകിപ്പോയി. ബ്രാഡിയിൽ നടക്കേണ്ടിയിരുന്ന അഫ്​ഗാനിസ്ഥാനെതിരായ ആദ്യ ഏക​ദിന പോരാട്ടം കനത്ത മഴയെ തുടർന്നു ഉപേക്ഷിച്ചതാണ് അവർക്ക് തിരിച്ചടിയായത്. ഒരു പന്ത് പോലും എറിയാൻ കഴിയാതെയാണ് ആദ്യ മത്സരം ഉപേക്ഷിച്ചത്.

ഈ വർഷം സെപ്റ്റംബർ 30നു മുൻപ് ഐസിസി ഏകദിന റാങ്കിങിൽ മുൻനിരയിലേക്ക് കയറിയാൽ അവർക്ക് ഏകദിന ലോകകപ്പ് നേരിട്ട് കളിക്കാനുള്ള അവസരമുണ്ടായിരുന്നു. ഇനി യോ​ഗ്യതാ മത്സരങ്ങൾ വിജയിച്ച് വേണം അയർലൻഡ് ലോകകപ്പിനെത്താൻ. നിലവിൽ ഏക​ദിന റാങ്കിങിൽ 12ാം സ്ഥാനത്താണ് അയർലൻഡ്.

അതേസമയം നേരിട്ട് യോ​ഗ്യതയ്ക്ക് ചില്ലറ കടമ്പകളായിരുന്നില്ല അവർക്ക് മുന്നിലുണ്ടായിരുന്നത്. അഫ്​ഗാനിസ്ഥാനെതിരായ പരമ്പര വിജയം മാത്രം പോരായിരുന്നു അവർക്ക് നേരിട്ട് യോ​ഗ്യത നേടാൻ. അഫ്​ഗാനിസ്ഥാനെതിരായ പരമ്പര 5-0ത്തിനു തൂത്തുവാരണം. ഇന്ത്യക്കെതിരെ ഏകദിന പരമ്പരയിലെ രണ്ട് മത്സരങ്ങൾ വെസ്റ്റ് ഇൻഡീസ് തോൽക്കുകയും വേണമായിരുന്നു. എന്നാൽ മഴ കളി മുടക്കിയതോടെ കാത്തിരിപ്പ് യോ​ഗ്യതാ പോരാട്ടത്തിലേക്ക് അവർക്ക് നീട്ടേണ്ടി വന്നു.

ദക്ഷിണാഫ്രിക്ക, സിംബാബ്‍വെ, നമീബിയ എന്നിവർ സംയുക്തമായാണ് 2027ലെ ഏകദിന ലോകകപ്പിനു ആതിഥേയത്വം വഹിക്കുന്നത്. 14 ടീമുകൾ മാറ്റുരയ്ക്കുന്ന പോരാട്ടത്തിലേക്ക് ആതിഥേയരെന്ന നിലയിൽ ദക്ഷിണാഫ്രിക്ക, സിംബാബ്‍വെ ടീമുകൾ യോ​ഗ്യത നേടിക്കഴിഞ്ഞു. ബാക്കിയുള്ള 12 ടീമുകളെ സെപ്റ്റംബർ 30ലെ ഐസിസി ഏകദിന റാങ്കിങ് അടസ്ഥാനത്തിലാണ് തീരുമാനിക്കുന്നത്. അയർലൻഡിന്റെ റാങ്കിങ് നിലവിൽ നേരിട്ട് യോ​ഗ്യതയ്ക്കു പര്യാപ്തമല്ല.

10 ടീമുകളാണ് യോ​ഗ്യതാ പോരിൽ മാറ്റുരയ്ക്കുന്നത്. ഈ ടൂർണമെന്റ് വിജയിക്കുന്നവരാണ് ലോകകപ്പിനു യോ​ഗ്യത നേടുക. രണ്ട്, മൂന്ന്, നാല് സ്ഥാനത്തെത്തുന്നവർ ലോകകപ്പിന്റെ സൂപ്പർ സീരീസിലേക്ക് തിരഞ്ഞെടുക്കപ്പെടും. ഈ സീരീസിൽ ജയിക്കുന്ന ടീം ലോകകപ്പിലെ അവസാന ടീമായും യോ​ഗ്യത ഉറപ്പിക്കും.