അഹമ്മദാബാദ്: ഇംഗ്ലണ്ടിനെതിരായ മൂന്നാം ഏകദിനത്തില്‍ സെഞ്ച്വറി പ്രകടനത്തോടെ റെക്കോര്‍ഡ് നേട്ടത്തിലെത്തി ഇന്ത്യന്‍ ഓപ്പണര്‍ ശുഭ്മാന്‍ ഗില്‍. ഏകദിന ഫോര്‍മാറ്റില്‍ 2500 റണ്‍സ് പൂര്‍ത്തിയാക്കിയ താരം, ഏറ്റവും വേഗത്തില്‍ ഈ നേട്ടം സ്വന്തമാക്കുന്ന താരമെന്ന റെക്കോര്‍ഡും അടിച്ചെടുത്തു.
ദക്ഷിണാഫ്രിക്കന്‍ താരം ഹാഷിം അംലയുടെ റെക്കോര്‍ഡാണ് പഴങ്കഥയായത്. 50 ഇന്നിങ്‌സിനുള്ളില്‍ ഈ നാഴികക്കല്ല് തികയ്ക്കുന്ന ആദ്യ താരമാണ് ഗില്‍. 2019 ജനുവരി 31ന് ന്യൂസിലന്‍ഡിനെതിരെ ഏകദിന ക്രിക്കറ്റില്‍ അരങ്ങേറിയ ഗില്‍ 50 ഏകദിനങ്ങളില്‍ നിന്നാണ് 2500 റണ്‍സ് പിന്നിട്ടത്.
ഇന്ത്യന്‍ താരങ്ങളില്‍ ഏറ്റവും വേഗത്തില്‍ ഈ നേട്ടം സ്വന്തമാക്കിയ ശ്രേയസ് അയ്യരുടെ (59 ഇന്നിങ്സ്) റെക്കോര്‍ഡും ഗില്‍ മറികടന്നു. ഗില്ലിനും അയ്യറിനും പിന്നാലെ ശിഖര്‍ ധവാന്‍ (60 ഇന്നിങ്സ്), കെഎല്‍ രാഹുല്‍ (63 ഇന്നിങ്സ്), വിരാട് കോഹ്ലി (64 ഇന്നിങ്സ്), നവ്ജോത് സിങ് സിദ്ധു (64 ഇന്നിങ്സ്) എന്നിവരും 2500 റണ്‍സ് തികയ്ക്കുന്ന ഏറ്റവും വേഗതയേറിയ ഇന്ത്യന്‍ ബാറ്റര്‍മാരുടെ പട്ടികയിലുണ്ട്.
മത്സരത്തില്‍ 102 പന്തില്‍ നിന്ന് 112 റണ്‍സാണ് ഗില്‍ നേടിയത്. 14 ഫോറും 3 സിക്‌സും അടങ്ങുന്നതായിരുന്നു ഗില്ലിന്റെ ഇന്നിങ്സ്. പരമ്പരയിലെ ആദ്യ മത്സരത്തില്‍ 96 പന്തില്‍ 87 റണ്‍സടിച്ച ഗില്‍ ഇന്ത്യയുടെ ടോപ് സ്‌കോററായിരുന്നു.
ഏറ്റവും വേഗത്തില്‍ 1500 (29 ഇന്നിങ്സുകളില്‍ നിന്ന്), 2000 റണ്‍സ് (38 ഇന്നിങ്സ്) റണ്‍സ് എന്ന അംലയുടെ റെക്കോര്‍ഡും ഗില്‍ തകര്‍ത്തു. ഏറ്റവും വേഗത്തില്‍ 3000 ഏകദിന റണ്‍സ് തികയ്ക്കുന്ന താരമെന്ന നേട്ടമാണ് ഇനി ഗില്ലിന് മുന്നിലുള്ളത്. 57 ഇന്നിങ്സുകളില്‍ നിന്ന് 3000 ഏകദിന റണ്‍സ് തികച്ച അംലയുടെ പേരിലാണ് നിലവില്‍ ഈ റെക്കോര്‍ഡ്.
തന്റെ ഏഴാമത്തെ ഏകദിന സെഞ്ച്വറിയോടെ മറ്റൊരു നേട്ടവും ഗില്‍ നേടി. അന്താരാഷ്ട്ര ക്രിക്കറ്റില്‍ മൂന്ന് ഫോര്‍മാറ്റുകളിലും സെഞ്ച്വറിയും ഇന്ത്യന്‍ പ്രീമിയര്‍ ലീഗില്‍ (ഐപിഎല്‍) മൂന്ന് സെഞ്ച്വറിയും താരം നേടിയിട്ടുണ്ട്. ഒരേ ഗ്രൗണ്ടില്‍ ടി20 , ഏകദിനം, ടെസ്റ്റ്, ഐപിഎല്‍ സെഞ്ച്വറി നേടുന്ന ചരിത്രത്തിലെ ആദ്യ താരമാണ് ഇന്ത്യ. ഒരേ ഗ്രൗണ്ടില്‍ എല്ലാ ഫോര്‍മാറ്റുകളിലും അന്താരാഷ്ട്ര സെഞ്ച്വറി നേടുന്ന അഞ്ചാമത്തെ കളിക്കാരനും ഇന്ത്യയില്‍ നിന്നുള്ള ആദ്യ താരമാണ് ഗില്‍.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
