ജമൈക്ക: ഒരു സീസണ്‍ ഇടവേളയ്ക്ക് ശേഷം കരീബിയന്‍ പ്രീമിയര്‍ ലീഗിലേക്ക് തിരിച്ചെത്തുകയായിരുന്നു ക്രിസ് ഗെയ്ല്‍. സീസണിലെ ആദ്യ മത്സരത്തില്‍ 9 പന്തില്‍ നിന്ന് 12 റണ്‍സ് മാത്രം എടുക്കാനെ ഗെയ്‌ലിന് കഴിഞ്ഞുള്ളു. എന്നാലവിടെ ഗെയ്ല്‍ കൂടാരം കയറിയത് സ്‌റ്റേഡിയത്തിലെ വിന്‍ഡോകളിലൊന്നിന്റെ ചില്ലും തകര്‍ത്ത്.
ടൂര്‍ണമെന്റിലേക്ക് തിരിച്ചെത്തുന്ന ഗെയ്‌ലിലേക്കായിരുന്നു ശ്രദ്ധയെല്ലാം. ഡ്വെയ്ന്‍ ബ്രാവോയുടെ സെന്റ് കിറ്റ്‌സിന് വേണ്ടി കളിക്കുന്ന ഗെയ്ല്‍ അഞ്ചാം ഓവറില്‍ ജാസന്‍ ഹോള്‍ഡറിന്റെ ഡെലിവറിയില്‍ കൂറ്റന്‍ സിക്‌സ് പറത്തി. സൈറ്റ്‌സ്‌ക്രീന്‍ കടന്നു പോയ ഗെയ്ല്‍ അതിന് പിന്നിലെ വിന്‍ഡോ തകര്‍ത്തു.
കളിയില്‍ ആ ഒരു സിക്‌സ് മാത്രമാണ് ഗെയ്‌ലില്‍ നിന്ന് വന്നത്. ഗെയ്‌ലിന് കത്തിക്കയറാന്‍ കഴിഞ്ഞില്ലെങ്കിലും സെന്റ് കിറ്റ്‌സ് 176 റണ്‍സ് കണ്ടെത്തുകയും ജയം തൊടുകയും ചെയ്തു. ഒരു ഘട്ടത്തില്‍ 39-4 എന്ന നിലയില്‍ തകര്‍ന്നിടത്ത് നിന്നാണ് സെന്റ് കിറ്റ്‌സ് തിരികെ കയറിയത്. എന്നാല്‍ 43 പന്തില്‍ നിന്ന് റൂത്ത്‌ഫോര്‍ഡ് 53 റണ്‍സും ബ്രാവോ 35 പന്തില്‍ നിന്ന് 47 റണ്‍സും നേടിയതോടെ മാന്യമായ സ്‌കോറിലേക്ക് സെന്റ് കിറ്റ്‌സ് എത്തി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
