ഫിഫ ലോകകപ്പ് മത്സരങ്ങൾ സൗജന്യമായി കാണാം; അവസരമൊരുക്കി റൊണാൾഡോ, ഇന്ത്യയിൽ ലഭിക്കില്ല?

ന്യൂഡൽഹി : 2026 ഫിഫ ലോകകപ്പിലെ എല്ലാ മത്സരങ്ങളും യൂട്യൂബിലൂടെ സൗജന്യമായി കാണാൻ അവസരം. പ്രമുഖ ഫുട്ബോൾ താരം ക്രിസ്റ്റ്യാനോ റൊണാൾഡോയ്ക്ക് നിക്ഷേപമുള്ള 'കാസേ ടിവി' (CazeTV) എന്ന ബ്രസീലിയൻ യൂട്യൂബ് ചാനലാണ് മത്സരങ്ങൾ സൗജന്യമായി സംപ്രേഷണം ചെയ്യുന്നത്. എന്നാൽ ഈ സൗജന്യ സേവനം ഇന്ത്യൻ ലഭ്യമാകില്ലെന്നാണ് റിപ്പോർട്ടുകൾ.

ബ്രസീലിയൻ സ്ട്രീമറായ കാസിമിറോ മിഗ്വേൽ ആരംഭിച്ച ഈ യൂട്യൂബ് പ്ലാറ്റ്ഫോം, 2022 ലോകകപ്പിലെ ചില മത്സരങ്ങൾ സംപ്രേഷണം ചെയ്തതോടെ വൻ ശ്രദ്ധ നേടിയിരുന്നു. തുടർന്ന് ഫിഫ വനിതാ ലോകകപ്പ്, ഫിഫ ക്ലബ് ലോകകപ്പ്, ഒളിമ്പിക്സ്, ദക്ഷിണ അമേരിക്കയിലെ പ്രധാന ഫുട്ബോൾ ടൂർണമെന്റുകൾ എന്നിവയും ഈ ചാനൽ വഴി സംപ്രേഷണം ചെയ്തിരുന്നു. ഇതോടെയാണ് 2026 ലോകകപ്പിലെ മത്സരങ്ങൾ 4കെ (4K) നിലവാരത്തിൽ സംപ്രേഷണം ചെയ്യാൻ അധികൃതർ തീരുമാനിച്ചിരിക്കുന്നത്.

എന്നാൽ ഈ യൂട്യൂബ് ചാനളിലൂടെ ഇന്ത്യയിൽ ഉള്ളവർക്ക് മത്സരം കാണാൻ കഴിയില്ല. ഈ സൗജന്യ സേവനം ബ്രസീലിനുള്ളിൽ മാത്രമായി(Geo-blocked) പരിമിതപ്പെടുത്തിയിട്ടുണ്ട്.

അത് കൊണ്ട് ഇന്ത്യയിലിരുന്ന് ഈ യൂട്യൂബ് ചാനൽ തുറന്നാലും മത്സരങ്ങൾ തത്സമയം കാണാൻ സാധിക്കില്ല. ഇന്ത്യയിലെ ഫുട്ബോൾ പ്രേമികൾക്കായി മത്സരങ്ങൾ തത്സമയം എത്തിക്കാൻ ഫിഫയും സീ എന്റർടെയിൻമെന്റും തമ്മിലുള്ള ചർച്ചകൾ തുടരുകയാണ്. ഏകദേശം 3 മുതൽ 3.5 കോടി യുഎസ് ഡോളർ (255- 300 കോടി രൂപ വരെ) നൽകിയാകും സീ എന്റർടെയിൻമെന്റ് സംപ്രേഷണാവകാശം സ്വന്തമാക്കുക എന്നാണ് റിപ്പോർട്ടുകൾ.