'പെരുമ വീണ്ടെടുക്കും'- ബ്രസീൽ ഫുട്ബോളിന്റെ തലപ്പത്തേക്ക് എത്താൻ റൊണാൾഡോ നസാരിയോ

റിയോ ഡി ജനീറോ: ബ്രസീൽ ഫുട്ബോളിന്റെ തലപ്പത്തേക്ക് എത്താനുള്ള ശ്രമവുമായി ഇതിഹാസ താരം റൊണാൾഡോ നസാരിയോയും. വരാനിരിക്കുന്ന ബ്രസീലിയൻ ഫുട്ബോൾ കോൺഫെഡറേഷൻ (സിബിഎഫ്) പ്രസിഡന്റ് സ്ഥാനത്തേക്ക് മത്സരിക്കുമെന്നു 48കാരനായ ഇതിഹാസ താരം പ്രഖ്യാപിച്ചു.

നിലവിൽ എഡ്നാൾഡോ റോഡ്ര​ഗസാണ് ഫെഡറേഷന്റെ അധ്യക്ഷൻ. 2026 വരെയാണ് അദ്ദേഹത്തിന്റെ കാലാവധി. പകരക്കാരനെ കണ്ടെത്താനുള്ള തെര‍ഞ്ഞെടുപ്പാണ് നടക്കാനിരിക്കുന്നത്.

ഐസിസി റാങ്കിങ്; ഏകദിന, ടി20 ബാറ്റിങില്‍ സ്മൃതി മന്ധാനയ്ക്ക് നേട്ടം

'സിബിഎഫിന്റെ പ്രസിഡന്റ് തെരഞ്ഞെടുപ്പിൽ സ്ഥാനാർഥിയാകാൻ നൂറു കണക്കിനു കാര്യങ്ങളാണ് എന്ന പ്രേരിപ്പിക്കുന്നത്. ബ്രസീൽ ടീമിന്റെ പെരുമ വീണ്ടെടുക്കാൻ ഞാൻ ആ​ഗ്രഹിക്കുന്നു. നിലവിൽ എനിക്ക് സ്പാനിഷ് ക്ലബ് റയൽ വല്ലാഡോളിഡിൽ ഓഹരിയുണ്ട്. സ്ഥാനാർഥിത്വത്തിനു അതൊരു തടസമാകില്ല. ഈ ​ഓഹരികൾ ഉടൻ വിൽക്കും'- സ്ഥാനാർഥിത്വം പ്രഖ്യാപിച്ച് റൊണാൾഡോ വ്യക്തമാക്കി.

1994, 2002 വർഷങ്ങളിൽ ബ്രസീലിനു ലോകകപ്പ് കിരീടം സമ്മാനിക്കുന്നതിൽ നിർണായക പങ്കു വഹിച്ച താരമാണ് റൊണാൾഡോ. അവരുടെ ചരിത്രത്തിലെ മികച്ച സ്ട്രൈക്കറായും അദ്ദേഹത്തെ ഫുട്ബോൾ ലോകം വിലയിരുത്തുന്നു.