തിരുവനന്തപുരം: കേരള ക്രിക്കറ്റ് ലീഗ് ടീമായ കൊച്ചി ബ്ലൂ ടൈഗേഴ്‌സ് ആരാധകര്‍ക്ക് ആവേശം പകര്‍ന്നുകൊണ്ട്, ടീമിന്റെ അടുത്ത സീസണിലെ നായക സ്ഥാനത്തേയ്ക്ക് സാലി സാംസണെ പ്രഖ്യാപിച്ചു. ഇന്ത്യന്‍ ക്രിക്കറ്റ് താരം സഞ്ജു സാംസണിന്റെ സഹോദരനാണ് സാലി സാംസണ്‍. സഞ്ജു സാംസണ്‍ ആണ് വൈസ് ക്യാപ്റ്റന്‍. സഞ്ജുവും ഓള്‍റൗണ്ടര്‍ കൂടിയായ സാലിയും ഒരുമിച്ച് കൊച്ചി ബ്ലൂ ടൈഗേഴ്‌സിനായി തകര്‍ത്തടിക്കുമോ എന്ന ആകാംക്ഷയിലാണ് ആരാധകര്‍.
അടിസ്ഥാന വിലയായ 75000 രൂപയ്ക്ക് ആണ് സാലിയെ കൊച്ചി ബ്ലൂ ടൈഗേഴ്‌സ് ടീമിലെത്തിച്ചത്. 34കാരനായ സാലി സാംസണ്‍ 2021ല്‍ ലിസ്റ്റ് എ ക്രിക്കറ്റില്‍ അരങ്ങേറ്റം കുറിച്ചിരുന്നു. ലിസ്റ്റ് എയില്‍ ആറു മത്സരങ്ങള്‍ കളിച്ചു. വലംകയ്യന്‍ ബാറ്ററാണ് സാലി. അഗ്രസീവ് ബാറ്റിങ് ശൈലിയാണ് സാലിയുടേയും.
സാലി അണ്ടര്‍ 16 വിഭാഗത്തില്‍ സൗത്ത് സോണിനായി കളിച്ചിട്ടുണ്ട്. കേരളത്തിന്റെ അണ്ടര്‍ 23, 25 ടീമുകളിലും അംഗമായിരുന്നു സഞ്ജുവിന്റെ സഹോദരന്‍. ഓഗസ്റ്റ് 21ന് ആണ് കേരള ക്രിക്കറ്റ് ലീഗ് ആരംഭിക്കുന്നത്. സെപ്റ്റംബര്‍ ആറ് വരെയാണ് ടൂര്‍ണമെന്റ്. തിരുവനന്തപുരത്താണ് മത്സരങ്ങള്‍.
28 ലക്ഷം രൂപയ്ക്കായിരുന്നു സഞ്ജു സാംസണിനെ കൊച്ചി ബ്ലൂ ടൈഗേഴ്‌സ് സ്വന്തമാക്കിയത്. കേരള ക്രിക്കറ്റ് ലീഗിന്റെ ആദ്യ സീസണില്‍ സഞ്ജു കളിച്ചിരുന്നില്ല. സഞ്ജുവിനെ സ്വന്തമാക്കാനായി കൊച്ചി ബ്ലൂ ടൈഗേഴ്‌സ് തങ്ങളുടെ അനുവദനീയമായ ലേലത്തുകയിലെ പകുതിയും ചിലവഴിച്ചിരുന്നു. രണ്ടാം സീസണിന് മുന്‍പായി കളിക്കാരെ ടീമില്‍ നിലനിര്‍ത്താതിരുന്നതോടെയാണ് കൊച്ചി ബ്ലൂ ടൈഗേഴ്‌സിന് 28 ലക്ഷം രൂപയ്ക്ക് സഞ്ജുവിനെ സ്വന്തമാക്കാനായത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
