ചരിത്ര നേട്ടത്തിനരികെ സഞ്ജു സാംസൺ; റെക്കോർഡിൽ പന്തിനേയും ധോനിയേയും പിന്തള്ളാൻ വേണ്ടത് 64 റൺസ്

ദുബൈ: ഏഷ്യാ കപ്പ് ഫൈനലിനു ഇറങ്ങുമ്പോൾ ഇന്ത്യയുടെ മലയാളി വിക്കറ്റ് കീപ്പർ ബാറ്റർ സഞ്ജു സാംസൺ ചരിത്ര നേട്ടത്തിനിരകിൽ. ഇന്ന് 64 റൺസ് നേടിയാൽ മൾട്ടി നാഷണൽ ടി20 ടൂർണമെന്റിൽ ഏറ്റവും കൂടുതൽ റൺസ് നേടുന്ന ഇന്ത്യൻ വിക്കറ്റ് കീപ്പർ ബാറ്ററെന്ന റെക്കോർഡാണ് താരത്തെ കാത്തിരിക്കുന്നത്. നിലവിൽ 108 റൺസാണ് സഞ്ജു ഇതുവരെ നേടിയത്.

171 റൺസടിച്ച ഋഷഭ് പന്തിന്റെ പേരിലാണ് റെക്കോർഡ്. ധോനിയാണ് റെക്കോർഡിൽ രണ്ടാമൻ. 154 റൺസാണ് ധോനിയുടെ നേട്ടം. 47 റൺസടിച്ചാൽ സഞ്ജുവിനു ധോനിയെ മറികടന്ന് രണ്ടാം സ്ഥാനത്തെത്താം.

ടൂർണമെന്റിൽ ബാറ്റിങിനു അവസരം കിട്ടിയപ്പോൾ ഒരിക്കൽ മാത്രമാണ് താരം പരാജയപ്പെട്ടത്. ഒമാനെതിരെ അർധ സെഞ്ച്വറിയും കഴിഞ്ഞ കളിയിൽ ശ്രീലങ്കക്കെതിരെ 23 പന്തിൽ 39 റൺസും സഞ്ജു സ്വന്തമാക്കി. 36 ശരാശരിയിൽ 127.05 സ്ട്രൈക്ക് റേറ്റിലാണ് ഇത്തവണ സഞ്ജു ഏഷ്യാ കപ്പിൽ ബാറ്റ് വീശിയത്.