ആഴ്സണലിനെതിരെ ​ഹാട്രിക്ക് നേടിയ ഒരേയൊരു ടോട്ടനം താരം! ഇതിഹാസം ടെറി ഡൈസൻ അന്തരിച്ചു

ലണ്ടൻ: ടോട്ടനം ഹോട്സ്പർ ഇതിഹാസ താരം ടെറി ഡൈസൻ അന്തരിച്ചു. ആഴ്സണലിനെതിരെ ഹാട്രിക്ക് നേടിയ ഒരേയൊരു ടോട്ടനം താരമെന്ന അപൂർവ റെക്കോർഡ് ഇപ്പോഴും കൊണ്ടുനടക്കുന്ന താരമാണ് ടെറി. 91 വയസായിരുന്നു. ഫുൾഹാം, കോൾചെസ്റ്റർ, ​ഗിൽഡ്ഫോർ‍ഡ് ടീമുകൾക്കായും ടെറി കളിച്ചിട്ടുണ്ട്. 10 വർഷത്തോളം ടോട്ടനം ജേഴ്സി ധരിച്ചു കളിച്ച ടെറി 209 മത്സരങ്ങളിൽ നിന്നു 55 ​ഗോളുകൾ നേടിയിട്ടുണ്ട്. 1960 കളിലെ ഏറ്റവും നിർണായകമായ രണ്ട് ഫൈനലുകളിൽ ടേട്ടനത്തിനായി വല ചലിപ്പിച്ച താരവും ടെറി തന്നെ.

1960-61 സീസണിൽ ബിൽ നിക്കോൾസന്റെ കീഴിൽ ഫസ്റ്റ് ഡിവിഷനും എഫ്എ കപ്പും സ്വന്തമാക്കിയ ടോട്ടനം ടീമിന്റെ സുപ്രധാന അം​ഗമായിരുന്നു ടെറി ഡൈസൻ. 20ാം നൂറ്റാണ്ടിൽ ആഭ്യന്തര ഡബിൾ നേട്ടം സ്വന്തമാക്കിയ ആദ്യ ഇം​ഗ്ലീഷ് ടീമന്നെ ചരിത്ര നേട്ടവും ടോട്ടനം അന്ന് കുറിച്ചു.

വെംബ്ലിയിൽ ലെസ്റ്റർ സിറ്റിയെ 2-0ത്തിനു വീഴ്ത്തിയ എഫ്എ കപ്പ് ഫൈനലിൽ ഡൈസൻ ​ഗോൾ നേടിയിരുന്നു. ആഭ്യന്തര വിജയങ്ങൾക്ക് പുറമെ യൂറോപ്യൻ വിജയങ്ങളും സ്വന്തമാക്കാൻ നിക്കോൾസന്റെ ടീമിൽ നിർണായകമായി നിന്നതും ഡൈസൻ തന്നെ. ‍ആഭ്യന്തര ഡബിൾ നേടി 2 വർഷത്തിനു ശേഷം യൂറോപ്യൻ മേജർ കിരീടം നേടുന്ന ആദ്യ ബ്രിട്ടീഷ് ക്ലബായും ടോട്ടനം മാറി.

1963ലെ യൂറോപ്യൻ കപ്പ് വിന്നേഴ്സ് കപ്പ് ഫൈനലിൽ അത്‍ലറ്റിക്കോ മാഡ്രിഡിനെതിരെ റോട്ടർഡാമിൽ വച്ച് നടന്ന പോരാട്ടത്തിൽ ടോട്ടനം 5-1നു ജയിച്ചപ്പോൾ ടെറി ഡൈസൻ രണ്ട് ​ഗോളുകൾ നേടി. അദ്ദേഹത്തിന്റെ കരിയറിലെ തന്നെ മികച്ച നിമിഷങ്ങളിലൊന്നായിരുന്നു ഈ പ്രകടനം. കരിയറിനെ ശ്രദ്ധേയമാക്കിയ മറ്റൊരു നേട്ടമാണ് അദ്ദേഹം ആഴ്സണലിനെതിരെ നേടിയ ഹാട്രിക്ക് ​ഗോളുകൾ. 1961-62 സീസണിന്റെ തുടക്കത്തിലാണ് നേർത്തേൺ ലണ്ടൻ ഡാർബിയിലെ ഈ ഹാട്രിക്ക്. ആഴ്സണലിനെതിരെ ഹാട്രിക്ക്​ ​ഗോളുകൾ നേടുന്ന ഒരേയൊരു ടോട്ടനം താരമെന്ന റെക്കോർഡ് ഇന്നും ടെറി ഡൈസന്റെ പേരിൽ തകരാതെ നിൽക്കുന്നു.