48 പന്തില്‍ 108 നേട്ടൗട്ട്, 'തീപ്പൊരി റിങ്കു'! ഏഷ്യാ കപ്പിനൊരുങ്ങുന്ന ഇന്ത്യയ്ക്ക് 'ഹാപ്പി' (വിഡിയോ)

ലഖ്‌നൗ: ഏഷ്യ കപ്പ് ടി20 പോരാട്ടത്തിനൊരുങ്ങുന്ന ഇന്ത്യയെ ഹാപ്പിയാക്കി റിങ്കു സിങ്. യുപി ടി20 ലീഗില്‍ താരത്തിന്റെ കിടിലന്‍ സെഞ്ച്വറി കരുത്തില്‍ ടീമിന് ജയം. മീററ്റ് മാവെറിക്‌സിനായി കളത്തിലെത്തിയ റിങ്കു വെറും 48 പന്തില്‍ അടിച്ചെടുത്തത് 108 റണ്‍സ്!

ഗൗര്‍ ഗോരഖ്പുര്‍ ലയണ്‍സിനെതിരായ പോരാട്ടത്തിലാണ് താരത്തിന്റെ വണ്‍ മാന്‍ ഷോയുടെ കരുത്തില്‍ ടീം നാടകീയ വിജയം പിടിച്ചത്. 168 റണ്‍സ് ലക്ഷ്യത്തിലേക്ക് ബാറ്റേന്തിയ മീററ്റ് ഒരു ഘട്ടത്തില്‍ 8 ഓവഖില്‍ 38 റണ്‍സിനിടെ 4 വിക്കറ്റുകള്‍ നഷ്ടമായി പരാജയത്തിനു മുന്നില്‍ പരുങ്ങി നില്‍ക്കുകയായിരുന്നു. ഈ ഘട്ടത്തിലാണ് റിങ്കുവിന്റെ ക്രീസിലേക്കുള്ള വരവ്. പിന്നീട് താരം കമ്പക്കെട്ടിനു തിരി കൊളുത്തുകയായിരുന്നു.

8 സിക്‌സും 7 ഫോറും സഹിതമാണ് താരത്തിന്റെ അതിവേഗ ശതകം. ഇതില്‍ അഞ്ച് സിക്‌സുകള്‍ താരം 6 പന്തിനിടെയാണ് നേടിയത്. 48 പന്തില്‍ 108 റണ്‍സുമായി താരം പുറത്താകാതെ നിന്നാണ് ടീമിനെ ജയിപ്പിച്ചത്. റിങ്കുവിന്റെ ടി20 ഫോര്‍മാറ്റിലെ കന്നി സെഞ്ച്വറി കൂടിയാണിത്.

ഐപിഎല്ലിലടക്കം സമീപ കാലത്ത് മികച്ച ഫോമിലെത്താൻ താരം പെടാപ്പാട് പെടുന്ന സമയത്താണ് മിന്നും സെഞ്ച്വറിയുമായുള്ള തിരിച്ചു വരവ്. ഏഷ്യാ കപ്പിനുള്ള 15 അം​ഗ ടീമിൽ ഉൾപ്പെട്ട താരത്തിനു പ്ലെയിങ് ഇലവനിലേക്ക് അവകാശമുന്നയിക്കാനുള്ള അവസരം കൂടി സെഞ്ച്വറി തുറന്നിടുന്നു.