14,505 ക്രിക്കറ്റ് പന്തുകൾ കൊണ്ട് ഒരു വാചകം! ​ഗിന്നസ് റെക്കോർഡിട്ട് വാംഖഡെ സ്റ്റേഡിയം

മുംബൈ: വാംഖഡെ സ്റ്റേഡിയത്തിലെ ആദ്യ മത്സരത്തിന്റെ 50 വാർഷികത്തിൽ വേറിട്ട ചടങ്ങിലൂടെ ​ഗിന്നസ് ലോക റെക്കോർഡ് സ്വന്തമാക്കി മുംബൈ ക്രിക്കറ്റ് അസോസിയേഷൻ. സ്റ്റേഡിയത്തിനകത്ത് വ്യാഴാഴ്ച ക്രിക്കറ്റ് പന്തുകൾ ഉപയോ​ഗിച്ചു എഴുതിയ 'ഫിഫ്റ്റി ഇയേഴ്സ് ഓഫ് വാംഖഡെ സ്റ്റേഡിയം' എന്ന വാചകത്തിലൂടെയാണ് റെക്കോർഡ് നേട്ടം. ക്രിക്കറ്റ് പന്ത് ഉപയോ​ഗിച്ച് സൃഷ്ടിച്ച ഏറ്റവും വലിയ വാചകമെന്ന അപൂർവ റെക്കോർഡാണ് മുംബൈ ക്രിക്കറ്റ് അസോസിയേഷൻ സ്വന്തമാക്കിയത്.

14,505 ക്രിക്കറ്റ് പന്തുകൾ ഉപയോ​ഗിച്ചാണ് മൈതാനത്ത് വാക്യം തയ്യാറാക്കിയത്. പരിമിത ഓവർ ക്രിക്കറ്റിനു ഉപയോ​ഗിക്കുന്ന വെളുത്ത പന്തും ടെസ്റ്റ് മത്സരങ്ങൾക്കായി ഉപയോ​ഗിക്കുന്ന ചുവന്ന പന്തും വാക്യമുണ്ടാക്കാനായി മൈതാനത്ത് നിരത്തി.

രഞ്ജി; നിധീഷിന് 5 വിക്കറ്റുകള്‍, മധ്യപ്രദേശിനെതിരെ കളി വരുതിയില്‍ നിര്‍ത്തി കേരളം

ഇന്ത്യൻ ക്രിക്കറ്റിനു കനപ്പെട്ട സംഭാവനകൾ നൽകിയ സച്ചിനും ​ഗാവസ്കറും ഉൾപ്പെടെ നിരവധി ഇതിഹാസങ്ങളുടെ ഹോം ​ഗ്രൗണ്ട് കൂടിയാണ് വാംഖഡ‍െ. 2011ൽ ഇന്ത്യ രണ്ടാം ഏകദിന ലോകകപ്പ് ഉയർത്തിയതും വാംഖഡെയിലാണ്.

1975 ജനുവരി 23നു ഇന്ത്യയും വെസ്റ്റ് ഇൻഡീസും തമ്മിലുള്ള ടെസ്റ്റ് പോരാട്ടമാണ് ഈ മൈതാനത്ത് അരങ്ങേറിയ ആദ്യ ക്രിക്കറ്റ് മത്സരം. വാക്യം തയ്യാറാക്കാനായി ഉപയോ​ഗിച്ച പന്തുകൾ മുംബൈയിലെ ക്രിക്കറ്റ് ക്ലബുകൾക്കും സ്കൂളുകൾക്കും നൽകുമെന്നു അസോസിയേഷൻ വ്യക്തമാക്കി.