മുംബൈ: ഇന്ത്യന് ടീമില് രോഹിത് ശര്മയുടെയും വിരാട് കോഹ്ലിയുടെയും ഭാവി എന്താകുമെന്ന് കാത്തിരിക്കുകയാണ് ആരാധകര്. പരിശീലകന് ഗൗതം ഗംഭീറും സീനിയര് താരങ്ങളും തമ്മില് പ്രശ്നങ്ങളുണ്ടെന്ന അഭ്യൂഹങ്ങളും നിലനില്ക്കുന്നുണ്ട്. ഇപ്പോള് ഗംഗീര് ഉള്പ്പെടെയുള്ളവരെ പരോക്ഷമായി വിമര്ശിച്ച് രംഗത്തെത്തിയിരിക്കുകയാണ് മുന് താരം ഹര്ഭജന് സിങ്.
ഇന്ത്യന് ടീമില് രോഹിതിന്റെയും കോഹ് ലിയുടെയും ഭാവി തീരുമാനിക്കുന്നത് ക്രിക്കറ്റില് വലിയ നേട്ടങ്ങള് കൈവരിക്കാത്തവരാണെന്നാണ് ഹര്ഭജന്റെ വിമര്ശനം. ഇത് നിര്ഭാഗ്യകരമാണെന്നും 2027 ലെ ഏകദിന ലോകകപ്പ് വരെ ഇരുവരും തുടരുമെന്നാണ് പ്രതീക്ഷയെന്നും ഹര്ഭജന് പറഞ്ഞു. രോഹിതും കോഹ്ലിയും ഇപ്പോള് ഏകദിന ഫോര്മാറ്റില് മാത്രമേ കളിക്കുന്നുള്ളൂ. ദക്ഷിണാഫ്രിക്കയില് നടക്കുന്ന ലോകകപ്പ് വരെ അവര്ക്ക് തുടരാന് കഴിയുമോ എന്നതിനെക്കുറിച്ചാണ് ആരാധകരുടെ ആശങ്ക. ഹെഡ് കോച്ച് ഗൗതം ഗംഭീറും സെലക്ഷന് കമ്മിറ്റി ചെയര്മാന് അജിത് അഗാര്ക്കറും ഇക്കാര്യത്തില് നിലപാട് വ്യക്തമാക്കിയിട്ടില്ല.
'ഇക്കാര്യത്തില് എനിക്ക് ഉത്തരം നല്കാന് കഴിഞ്ഞേക്കില്ല, കാരണം ഞാനും ഒരു കളിക്കാരനാണ്, ഇതെല്ലാം എനിക്കും സംഭവിച്ചിട്ടുണ്ട്. എന്റെ സഹതാരങ്ങളില് പലര്ക്കും ഇത് സംഭവിച്ചിട്ടുണ്ട്, പക്ഷേ ഇത് വളരെ നിര്ഭാഗ്യകരമാണ്. വിരാട് കോഹ്ലിയെപ്പോലെ ഇപ്പോഴും മികച്ച പ്രകടനം കാഴ്ചവയ്ക്കുന്ന ഒരു കളിക്കാരനെ കാണുമ്പോള് എനിക്ക് വളരെ സന്തോഷമുണ്ട്. എന്നാല് കാര്യമായ നേട്ടങ്ങള് കൈവരിക്കാത്ത ആളുകള് അവരുടെ ഭാവിയെക്കുറിച്ച് തീരുമാനിക്കുന്നത് അല്പ്പം നിര്ഭാഗ്യകരമാണ്' ഹന്ഭജന് പറഞ്ഞു. ലോകകപ്പില് ആദ്യ പന്ത് എറിയാന് ഇനിയും ഒരു വര്ഷം ബാക്കിയുണ്ട്, പക്ഷേ രോഹിതും കോഹ്ലിയും മികച്ച ഫോമില് തുടരണമെന്നും അടുത്ത തലമുറയ്ക്ക് മാതൃകയാകണമെന്നും ഹര്ഭജന് പറഞ്ഞു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
