അമേരിക്കയെ അട്ടിമറിച്ച് റിലേ സ്വർണം; ചരിത്ര നേട്ടം ആഘോഷിച്ച് ബോട്സ്വാന, രാജ്യത്തിന് പൊതു അവധി!

​ഗാബൊറോൺ: ലോക അത്‍ലറ്റിക്സ് ചാംപ്യൻഷിപ്പിൽ ചരിത്രത്തിലാദ്യമായി റിലേ സ്വർണം സ്വന്തമാക്കിയതിന്റെ സന്തോഷ സൂചകമായി രാജ്യത്ത് പൊതു അവധി പ്രഖ്യാപിച്ച് ആഫ്രിക്കൻ രാജ്യമായ ബോട്സ്വാന. പുരുഷൻമാരുടെ 4 x 400 മീറ്റർ റിലേയിൽ കരുത്തരായ അമേരിക്കയെ അട്ടിമറിച്ചാണ് ബോട്സ്വാനയുടെ സുവർണ നേട്ടം. അമേരിക്ക ടീം വെള്ളിയും ദക്ഷിണാഫ്രിക്ക ടീം വെങ്കലവും നേടി.

പിന്നാലെയാണ് രാജ്യം ആഘോഷത്തിന്റെ ഭാ​ഗമായി അവധി പ്രഖ്യാപിച്ചത്. ഈ മാസം 29നാണ് പൊതു അവധി. ബോട്സ്വാനയുടെ സ്വാതന്ത്ര്യ ദിനത്തിന്റെ തലേദിവസമാണ് അവധി. പ്രസിഡ‍ന്റ് ഡ്യൂമ ​ഗിഡിയോൺ ബൊക്കൊയാണ് പ്രഖ്യാപനം നടത്തിയത്.

കഴിഞ്ഞ ദിവസമാണ് ഐതിഹാസിക സ്വർണം ബോട്സ്വാന ഓടിപ്പിടിച്ചത്. ലീ ഭെകെംബിലോ എപ്പി, ലെറ്റ്സിൽ ടെബോഗോ, ബയാപോ എന്‍ഡോരി, ബസങ് കോളൻ കെബിനാറ്റ്ഷിപി എന്നിവരടങ്ങിയ ടീമാണ് സ്വര്‍ണം നേടിയത്. 2 മിനിറ്റ് 57.76 സെക്കൻഡിൽ ഫിനിഷ് ചെയ്താണ് ടീമിന്റെ നേട്ടം. അവസാന ലാപ്പിൽ അമ്പരപ്പിക്കും വേ​ഗതയിൽ കുതിച്ച കെബിനാറ്റ്ഷിപിയുടെ മികവാണ് അവരെ അത്ഭുത വിജയത്തിലേക്ക് നയിച്ചത്. നേരത്തെ 400 മീറ്ററിലും കെബിനാറ്റ്ഷിപി സ്വർണം നേടിയിരുന്നു.

2024 പാരിസ് ഔളിംപിക്സിൽ രാജ്യത്തിന്റെ ആദ്യ ഒളിപിംക് സ്വർണം ലെറ്റ്സിൽ ടെബോ​ഗോ സ്വർണം നേടിയിരുന്നു. 200 മീറ്ററിലായിരുന്നു താരത്തിന്റെ നേട്ടം. അന്ന് രാജ്യത്തിനു പകുതി ദിവസം പൊതു അവധി പ്രഖ്യാപിച്ചിരുന്നു.