പരിശീലനത്തിനിടെ അപകടം; ഹാട്രിക്ക് ലോക ചാമ്പ്യൻ സൈക്ലിസ്റ്റ് ആമി പീറ്റേഴ്‌സ് കോമയിൽ

മാഡ്രിഡ്: പരിശീലനത്തിനിടെയുണ്ടായ അപകടത്തെ തുടർന്ന് ശസ്ത്രക്രിയക്ക് വിധേയയാക്കിയ ഡച്ച് സൈക്ലിസ്റ്റ് ആമി പീറ്റേഴ്‌സ് കോമയിൽ. സ്‌പെയ്‌നിലെ കാൽപെയിൽ നടന്ന ഡച്ച് ദേശീയ ടീമിന്റെ പരിശീലനത്തിനിടെയാണ് ആമിക്ക് പരിക്കേറ്റത്. കൂട്ടിയിടിച്ച് വീണ താരത്തിന്റെ തലയ്ക്ക് സാരമായ പരിക്കേൽക്കുകയായിരുന്നു. 

മൂന്ന് തവണ മാഡിസൺ ലോക സൈക്ലിങ് ചാമ്പ്യൻഷിപ്പിൽ ജേതാവാണ് ആമി. കൂട്ടിയിടിക്ക് ശേഷം ബോധം നഷ്ടപ്പെട്ട ആമിയെ ഉടൻ തന്നെ എയർ ആംബുലൻസിൽ ആശുപത്രിയിലേക്ക് മാറ്റുകയായിരുന്നു. 

തലച്ചോറിലെ സമ്മർദം ഒഴിവാക്കുന്നതിന് വേണ്ടി നടത്തിയ ശസ്ത്രക്രിയക്ക് ശേഷം മെഡിക്കൽ സംഘം താരത്തെ കോമ സ്ഥിതിയിൽ പ്രവേശിപ്പിച്ചിരിക്കുകയാണ്. 2019, 2020, 2021 വർഷങ്ങളിലാണ് തുടർച്ചയായി മാഡിസൺ ലോക ചാമ്പ്യൻഷിപ്പ് ആമി പീറ്റേഴ്‌സ് വിജയിച്ചത്.