ലണ്ടന്‍: ലോകകപ്പിന്റെ സെമി കാണാതെ പാകിസ്ഥാന്‍ പുറത്തായെങ്കിലും അവരുടെ യുവ താരങ്ങള്‍ മൈതാനത്ത് പുറത്തെടുത്ത പ്രകടനങ്ങള്‍ ശ്രദ്ധേയമായിരുന്നു. ബംഗ്ലാദേശിനെതിരായ അവസാന പോരാട്ടത്തില്‍ വിജയിച്ചിട്ടും അവര്‍ക്ക് അവസാന കണക്കെടുപ്പില്‍ പുറത്തേക്ക് പോകാനായിരുന്നു വിധി.
ബംഗ്ലാദേശിനെതിരായ പോരാട്ടത്തില്‍ പാകിസ്ഥാന്റെ വിജയം അനായാസമാക്കിയത് ഷഹീന്‍ ഷാ അഫ്രീദിയെന്ന 19കാരന്‍ പേസറുടെ മിന്നും ബൗളിങായിരുന്നു. മത്സരത്തില്‍ ആറ് വിക്കറ്റുകളാണ് താരം വീഴ്ത്തിയത്. 9.1 ഓവറില്‍ 35 റണ്‍സ് മാത്രം വിട്ടു നല്‍കിയായിരുന്നു ഷഹീന്റെ മികച്ച പ്രകടനം. അന്താരാഷ്ട്ര ഏകദിന കരിയറിലെ താരത്തിന്റെ ഏറ്റവും മികച്ച പ്രകടനമായും ഇത് മാറി.
ഒരുപിടി റെക്കോര്‍ഡുകളും ഈ പ്രകടനത്തോടെ താരം സ്വന്തമാക്കി. 16 വിക്കറ്റുകളാണ് ഈ ലോകകപ്പില്‍ ഷഹീന്‍ മൊത്തം നേടിയത്. ഒരു ലോകകപ്പില്‍ അഞ്ചോ അതിലധികമോ വിക്കറ്റുകള്‍ വീഴ്ത്തുന്ന ഏറ്റവും പ്രായം കുറഞ്ഞ താരം. ഒരു ലോകകപ്പില്‍ ഏറ്റവും കൂടുതല്‍ വിക്കറ്റെടുക്കുന്ന കൗമാര താരം. ലോകകപ്പില്‍ ഒരു പാകിസ്ഥാന്‍ ബൗളറുടെ ഏറ്റവും മികച്ച ബൗളിങ് പ്രകടനം തുടങ്ങിയ റെക്കോര്‍ഡുകളാണ് ഒറ്റ പ്രകടനം കൊണ്ട് ഷഹീന്‍ പോക്കറ്റിലാക്കിയത്.
2011ലെ ലോകകപ്പില്‍ കെനിയക്കെതിരെ ഷാഹീദ് അഫ്രീദി നേടിയ അഞ്ച് വിക്കറ്റുകള്‍ വീഴ്ത്തിയതായിരുന്നു ലോകകപ്പിലെ ഒരു പാക് താരത്തിന്റെ മികച്ച ബൗളിങ്. എട്ടോവറില്‍ 16 റണ്‍സ് മാത്രം വഴങ്ങിയായിരുന്നു ഷാഹീദ് അഫ്രീദി അഞ്ച് വിക്കറ്റുകള്‍ വീഴ്ത്തിയത്. എട്ട് വര്‍ഷങ്ങള്‍ക്കിപ്പുറം മറ്റൊരു അഫ്രീദി അത് തന്റെ പേരിലാക്കി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
