പോര്‍ട്ട് എലിസബത്ത് : ഓസ്‌ട്രേലിയക്കെതിരായ രണ്ടാം ട്വന്റി-20 മല്‍സരത്തില്‍ ദക്ഷിണാഫ്രിക്കയ്ക്ക് അവിശ്വസനീയ വിജയം. അവസാന നിമിഷം വരെ വിജയമുറപ്പിച്ചു കളിച്ച ഓസീസിനെ തന്ത്രപരമായ ബോളിങ്ങിലൂടെ വരിഞ്ഞുമുറുക്കിയ ദക്ഷിണാഫ്രിക്ക 12 റണ്‍സിനാണ് തോല്‍പ്പിച്ചത്. വിഡയത്തോടെ ദക്ഷിണാഫ്രിക്ക പരമ്പരയില്‍ ഒപ്പമെത്തി. ഒന്നാം ട്വന്റി20 യില്‍ 107 റണ്‍സിന്റെ കൂറ്റന്‍ തോല്‍വി സമ്മാനിച്ച ഓസ്‌ട്രേലിയയോടുള്ള മധുരപ്രതികാരം കൂടിയായി ഈ വിജയം.
ടോസ് നേടി ബാറ്റിങ് തെരഞ്ഞെടുത്ത ദക്ഷിണാഫ്രിക്ക നിശ്ചിത 20 ഓവറില്‍ നേടിയത് നാലു വിക്കറ്റ് നഷ്ടത്തില്‍ 158 റണ്‍സ്. ഓസ്‌ട്രേലിയയുടെ മറുപടി 20 ഓവറില്‍ ആറു വിക്കറ്റ് നഷ്ടത്തില്‍ 146 റണ്‍സില്‍ അവസാനിച്ചു. ഓപ്പണര്‍ ഡേവിഡ് വാര്‍ണര്‍ അര്‍ധസെഞ്ചുറിയുമായി പുറത്താകാതെ നിന്നെങ്കിലും ഓസീസിനെ വിജയത്തിലെത്തിക്കാനായില്ല. വാര്‍ണര്‍ 56 പന്തില്‍ അഞ്ചു ഫോറും ഒരു സിക്‌സും സഹിതം 67 റണ്‍സെടുത്തു.
ക്യാപ്റ്റന്‍ ആരോണ്‍ ഫിഞ്ച് (12 പന്തില്‍ 14), സ്റ്റീവ് സ്മിത്ത് (26 പന്തില്‍ 29), അലക്‌സ് കാരി (10 പന്തില്‍ 14), എന്നിങ്ങനെയാണ് മറ്റ് ഓസീസ് താരങ്ങളുടെ പ്രകടനം. ദക്ഷിണാഫ്രിക്ക ഉയര്‍ത്തിയ 159 റണ്‍സ് വിജയലക്ഷ്യം പിന്തുടര്‍ന്ന ഓസ്‌ട്രേലിയ 16-ാം ഓവര്‍ വരെ വിജയവഴിയിലായിരുന്നു. 16 ഓവര്‍ പൂര്‍ത്തിയാകുമ്പോള്‍ മൂന്നു വിക്കറ്റ് നഷ്ടത്തില്‍ 127 റണ്‍സ് എന്ന നിലയിലായിരുന്നു ഓസീസ്. ഏഴു വിക്കറ്റ് കയ്യിലിരിക്കെ 24 പന്തില്‍ വിജയത്തിലേക്കു വേണ്ടിയിരുന്നത് 32 റണ്‍സ് മാത്രം.
എന്നാല്‍ അവസാന നാല് ഓവറുകള്‍ ബോള്‍ ചെയ്ത കഗീസോ റബാദയും ലുങ്കി എന്‍ഗിഡിയും ആന്റിച് നോര്‍ജെയും ചേര്‍ന്ന് അവസാന 24 പന്തില്‍ വിട്ടുകൊടുത്തത് 19 റണ്‍സ് മാത്രം. മൂന്നു വിക്കറ്റും വീഴ്ത്തി. റബാദ എറിഞ്ഞ 17-ാം ഓവറില്‍ ഓസീസിന് നേടാനായത് ഏഴു റണ്‍സ് മാത്രം. ഇതോടെ വിജയലക്ഷ്യം 18 പന്തില്‍ 25 റണ്‍സായി ഉയര്‍ന്നു. ലുങ്കി എന്‍ഗിഡി എറിഞ്ഞ 18-ാം ഓവറില്‍ അഞ്ച് റണ്‍സ് മാത്രമാണ് ലഭിച്ചത്. മിച്ചല്‍ മാര്‍ഷിന്റെ ( ആറ് റണ്‍സ്) വിക്കറ്റും നഷ്ടമായി.
ഇതോടെ വിജയലക്ഷ്യം 12 പന്തില്‍ 20 റണ്‍സായി ഉയര്‍ന്നു. 19-ാം ഓവറിന്റെ ആദ്യ പന്തില്‍ത്തന്നെ കഗീസോ റബാദ മാത്യു വെയ്ഡിനെ പുറത്താക്കി. വാര്‍ണര്‍- ആഷ്ടണ്‍ ആഗര്‍ സഖ്യത്തിന് ആ ഓവറില്‍ നേടാനായത് മൂന്നുറണ്‍സ് മാത്രവും. നോര്‍ജെ എറിഞ്ഞ അവസാന ഓവറില്‍ വിജയിക്കാന്‍ 13 റണ്‍സ് വേണ്ടിയിരിക്കെ ഓസീസിന് നേടാനായത് നാലു റണ്‍സ് മാത്രം.ആഗറിന്റെ വിക്കറ്റും നഷ്ടമായി. 12 റണ്‍സിന്റെ ത്രസിപ്പിക്കുന്ന വിജയത്തോടെ പരമ്പരയില്‍ ദക്ഷിണാഫ്രിക്ക ഒപ്പത്തിനൊപ്പമെത്തി.
എന്‍ഗിഡി നാല് ഓവറില്‍ 41 റണ്‍സ് വഴങ്ങി മൂന്നു വിക്കറ്റെടുത്തു. റബാദയും നോര്‍ജെയും പ്രിട്ടോറിയസും ഓരോ വിക്കറ്റ് വീതം നേടി. വിക്കറ്റ് കിട്ടിയില്ലെങ്കിലും ടബേരസ് ഷംസി നാലോവറില്‍ വഴങ്ങിയത് 17 റണ്‍സ് മാത്രം. നേരത്തെ, ക്യാപ്റ്റന്‍ ക്വിന്റണ്‍ ഡികോക്കിന്റെ അര്‍ധസെഞ്ചുറിയാണ് ദക്ഷിണാഫ്രിക്കയ്ക്ക് ഭേദപ്പെട്ട സ്‌കോര്‍ സമ്മാനിച്ചത്. ഡികോക്ക് 47 പന്തില്‍ അഞ്ചു ഫോറും നാലു സിക്‌സും സഹിതം 70 റണ്‍സെടുത്തു. ബ്യൂറന്‍ ഹെന്‍ഡ്രിക്‌സ് 14ഉം, ഫാഫ് ഡുപ്ലേസി 15 ഉം, വാന്‍ഡര്‍ ദസ്സന്‍ 26 പന്തില്‍ 37 ഉം റണ്‍സെടുത്തു. അര്‍ധസെഞ്ചുറി നേടിയ ദക്ഷിണാഫ്രിക്കന്‍ നായകന്‍ ക്വിന്റണ്‍ ഡികോക്കാണ് കളിയിലെ കേമന്‍.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
