ഐ-ലീഗ് മത്സരങ്ങൾ റദ്ദാക്കാൻ തീരുമാനം, മോഹൻ ബഗാൻ ചാംപ്യന്മാരാകും 

ന്യൂഡൽഹി: അവശേഷിക്കുന്ന ഐ-ലീഗ് മത്സരങ്ങൾ റദ്ദാക്കാനും പോയിന്റ് പട്ടികയിൽ മുന്നിലുള്ള മോഹൻ ബഗാനെ ചാംപ്യന്മാരായും പ്രഖ്യാപിക്കാനും തീരുമാനം. കൊറോണ വൈറസ് വ്യാപനത്തിന്റെ പശ്ചാത്തലത്തിൽ ഇന്ന് ചേർന്ന യോഗത്തിലാണ് തീരുമാനം. 

നിലവിലെ സാഹചര്യത്തിൽ 2019-20 സീസൺ സമാപിക്കുന്നതായി കണക്കാക്കണമെന്ന് ഐ-ലീഗ് പാനൽ ശുപാർശ ചെയ്തതായി എഐഎഫ്എഫ് പ്രസ്താവനയിൽ അറിയിച്ചു. നിലവിലെ പോയിന്റ് പട്ടികയുടെ അടിസ്ഥാനത്തിൽ മോഹൻ ബഗാനെ ഹീറോ ഐ-ലീഗ് ചാംപ്യന്മാരായും പ്രഖ്യാപിക്കണമെന്നും പാനൽ ആവശ്യപ്പെട്ടു. 

രാജ്യത്ത് ആഹ്വാനം ചെയ്തിരിക്കുന്ന ലോക്ക്ഡൗൺ മെയ് മൂന്ന് വരെ നീട്ടിയിരുന്ന സാഹചര്യത്തിൽ മത്സരങ്ങൾ പുനഃക്രമീകരിക്കേണ്ടതില്ലെന്നാണ് വീഡിയോ കോൺഫറൻസിലൂടെ നടന്ന ഐ-ലീഗ് പാനൽ യോഗത്തിന്റ തീരുമാനം. പാനലിന്റെ നിർദേശങ്ങൾ എഐഎഫ്എഫ് എക്സിക്യൂട്ടീവ് കമ്മിറ്റി അം​ഗീകരിച്ചാൽ മതി.