ഓസീസിനെ വിറപ്പിക്കാൻ 16കാരൻ; നസീം ഡെന്നീസ് ലില്ലിയെ ഓർമ്മിപ്പിക്കുന്നുവെന്ന് വഖാർ

ഇസ്‍ലാമബാദ്: ഓസ്ട്രേലിയക്കെതിരായ ടെസ്റ്റ് പരമ്പരയിൽ പാകിസ്ഥാന് വേണ്ടി അരങ്ങേറാനൊരുങ്ങി 16കാരൻ. പേസർ നസീം ഷായാണ് അരങ്ങേറ്റം കുറിക്കാനൊരുങ്ങുന്നത്.  വ്യാഴാഴ്ച ഓസ്ട്രേലിയയ്ക്കെതിരായ ആദ്യ ടെസ്റ്റിൽ പാകിസ്ഥാന്‍‌ ബൗളിങ് നിരയെ നയിക്കുക നസീം ഉൾപ്പെടെ മൂന്ന് യുവ പേസർമാരാണ്. നസീമിനൊപ്പം 19 കാരൻ മുഹമ്മദ് മൂസ, ഷഹീൻ അഫ്രിദി എന്നിവരെയും ഇറക്കി മികച്ച പോരാട്ടം കാഴ്ച വയ്ക്കുകയാണ് പാകിസ്ഥാൻ ലക്ഷ്യമിടുന്നത്.

കളിക്കാനിറങ്ങിയാൽ ഒരു റെക്കോർ‍ഡ് കൂടി നസീം ഷായ്ക്കു സ്വന്തമാകും. ഓസ്ട്രേലിയൻ‌ മണ്ണിൽ ടെസ്റ്റിലെ ആദ്യ മത്സരം കളിക്കുന്ന പ്രായം കുറഞ്ഞ താരമെന്ന നേട്ടമാണ് താരത്തിന് സ്വന്തമാകുക. മുൻ ഓസീസ് ക്യാപ്റ്റൻ ഇയാൻ ക്രെയ്ഗാണ് ഓസ്ട്രേലിയയിൽ ടെസ്റ്റ് കളിച്ച ഏറ്റവും പ്രായം കുറഞ്ഞ താരം. 1953ൽ 17ാം വയസിൽ ദക്ഷിണാഫ്രിക്കയ്ക്കെതിരെയാണ് ക്രെയ്ഗ് ടെസ്റ്റിൽ അരങ്ങേറിയത്. 

അതേസമയം യുവ പാക് താരങ്ങൾക്കു മേൽ മാധ്യമങ്ങൾ വലിയ സമ്മർദമുണ്ടാക്കുന്നതായി പാകിസ്ഥാൻ പരിശീലകൻ മിസ്ബ ഉൾ ഹഖ് വ്യക്തമാക്കി. എന്നാൽ അങ്ങനെ അരങ്ങേറിയ യുവ താരങ്ങൾ എല്ലാ സമയത്തും പാക് ക്രിക്കറ്റ് മികച്ച സംഭാവനകൾ നൽകിയിട്ടുണ്ടെന്ന്  ആരാധകർ ചൂണ്ടിക്കാട്ടുന്നു. പാകിസ്ഥാനു വേണ്ടി ഏറ്റവും കൂടുതൽ ടെസ്റ്റ് വിക്കറ്റുകൾ വീഴ്ത്തിയിട്ടുള്ള രണ്ടാമത്തെ താരമായ വഖാർ യൂനിസിനെയാണ് ആരാധകർ ഉദാഹരണമായി പറയുന്നത്. 1989ൽ കറാച്ചിയിൽ ഇന്ത്യയ്ക്കെതിരെ അരങ്ങേറുമ്പോൾ യൂനിസിന് പ്രായം 18 വയസ് മാത്രമായിരുന്നു.

നിലവിൽ പാകിസ്ഥാന്റെ ബൗളിങ് പരിശീലകനാണ് വഖാർ യൂനിസ്. ഓസ്ട്രേലിയയുടെ മുൻ ഫാസ്റ്റ് ബോളർ ‍ഡെനീസ് ലില്ലിയെ ഓർമിപ്പിക്കുന്നതാണ് നസീം ഷായുടെ ശൈലിയെന്ന് യൂനിസ് പറയുന്നു. ഡെനീസിന്റെയും നസീമിന്റെയും ബൗളിങ് ശൈലികൾ സമാനമാണെന്നും യൂനിസ് വ്യക്തമാക്കി.