ന്യൂഡല്ഹി: കളിക്കളത്തിലെ മിസ്റ്റര് കൂള് ആയ ക്യാപ്റ്റനാണ് മുന് ഇന്ത്യന് നായകന് കൂടിയായ മഹേന്ദ്ര സിങ് ധോനി. കഴിഞ്ഞ ദിവസം ക്യാപ്റ്റന് കൂള് ഹോട്ടായി മാറിയതിനെ കുറിച്ച് കുല്ദീപ് യാദവ് തുറന്നു പറഞ്ഞിരുന്നു. ഇതിന് പിന്നാലെയിതാ ധോനി കളിക്കളത്തില് ചൂടായതിനെക്കുറിച്ചുള്ള ഓര്മ പങ്കിടുകയാണ് ഇന്ത്യന് പേസര് ഇഷാന്ത് ശര്മ.
കഴിഞ്ഞ വര്ഷത്തെ ഐപിഎല് ക്വാളിഫയറില് ചെന്നൈ സൂപ്പര് കിങ്സ്- ഡല്ഹി ക്യാപിറ്റല്സ് മത്സരത്തിലെ രസകരമായൊരു നിമിഷത്തെക്കുറിച്ചാണ് ഇഷാന്ത് മനസ് തുറന്നത്. ഡല്ഹിക്കായി ബാറ്റ് ചെയ്യാന് ക്രീസിലെത്തിയപ്പോഴായിരുന്നു എപ്പോഴും കൂളായ ധോണി ചൂടായതെന്ന് ഇഷാന്ത് പറഞ്ഞു.
രവീന്ദ്ര ജഡേജയായിരുന്നു ആ സമയം ചെന്നൈക്കായി പന്തെറിഞ്ഞന്നത്. ഞാന് ക്രീസിലെത്തിയപ്പോള് ധോനി എന്നെ കളിയാക്കി പറഞ്ഞു സിക്സൊന്നും അടിക്കാനാവില്ല, കാരണം നിനക്ക് അത്ര ശക്തിയൊന്നുമില്ല. അപ്പോഴാണ് ജഡേജ എനിക്കെതിരെ പന്തെറിയാനെത്തുന്നത്. ജഡേജയുടെ പന്തില് ആദ്യം ഒരു ബൗണ്ടറി നേടിയ ഞാന്, അടുത്ത പന്ത് സിക്സറിന് പറത്തി.
എന്നിട്ട് പ്രതികരണമറിയാനായി ഞാന് തിരിഞ്ഞ് ധോനിയുടെ മുഖത്തേക്ക് നോക്കി. എന്നാല് എന്നെ ഒന്നു നോക്കുക പോലും ചെയ്യാതെ, ജഡേജയെ ചെവി പൊട്ടുന്ന ചീത്ത വിളിക്കുകയായിരുന്നു ധോനിയെന്ന് ഇഷാന്ത് വ്യക്തമാക്കി. ഐസൊലേഷന് പ്രീമിയര് ലീഗ് എന്ന ചാറ്റ് ഷോയില് പങ്കെടുത്ത് സംസാരിക്കുകയായിരുന്നു ഇഷാന്ത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
