മാഡ്രിഡ്: ലോക ഫുട്ബോളിലെ മികച്ച താരമാര് എന്നത് ലയണല് മെസിയേയും ക്രിസ്റ്റിയാനോ റൊണാള്ഡോയേയും മുന്നിര്ത്തി കാലങ്ങളായി നടക്കുന്ന ചര്ച്ചയാണ്. നിലവില് ലോക ഫുട്ബോളിലെ മികച്ച യുവ താരമായി പരിഗണിക്കുന്നത് ഫ്രഞ്ച് താരം കെയ്ലിയന് എംബാപ്പെയെയാണ്. ഫ്രാന്സിന്റെ രണ്ടാം ലോകകപ്പ് കിരീട നേട്ടത്തിന് വഴിയൊരുക്കിയ താരങ്ങളില് മുന്നില് നില്ക്കുന്ന എംബാപ്പെ ഇരു സൂപ്പര് താരങ്ങളുടേയും ഗണത്തിലേക്ക് ഭാവിയില് ഉയരുമെന്നാണ് ഫുട്ബോള് പണ്ഡിതന്മാരുടെ വിലയിരുത്തല്. 19ാം വയസില് തന്നെ ലോകകപ്പ് നേട്ടത്തില് പങ്കാളിയായ എംബാപ്പെയ്ക്ക് പാരിസ് സെന്റ് ജെര്മെയ്നൊപ്പം ക്ലബ് തലത്തിലും നേട്ടങ്ങളേറെ.
യൂറോപ്പിലെ മുന്നിര ക്ലബുകളില് പലതും എംബാപ്പെയെ തങ്ങളുടെ പാളയത്തിലെത്തിക്കുന്നതിനായി ശ്രമം തുടരുന്നുണ്ട്. ഇപ്പോഴിതാ താരത്തിന് മുന്നില് മികച്ച ഓഫറുമായി വന്നിരിക്കുകയാണ് സ്പാനിഷ് ചാംപ്യന്മാരായ ബാഴ്സലോണ. 150 കോടിയിലേറെ പ്രതിഫലം വാഗ്ദാനം ചെയ്താണ് കറ്റാലന് കരുത്തര് ഫ്രഞ്ച് താരത്തിനെ ടീമിലെത്തിക്കാന് ശ്രമിക്കുന്നത്. ഇപ്പോള് ടീമിലുള്ള ബ്രസീല് താരം ഫിലിപ്പ് കുട്ടീഞ്ഞോയെ പിഎസ്ജിക്ക് കൈമാറി എംബാപ്പെയെ ടീമിലെത്തിക്കാനാണ് ബാഴ്സ ശ്രമിക്കുന്നതെന്ന് വിദേശ മാധ്യമങ്ങളാണ് റിപ്പോര്ട്ട് ചെയ്യുന്നത്.
നിലവില് പിഎസ്ജിയില് എംബാപ്പെയുടെ സഹ താരമായി കളിക്കുന്ന ബ്രസീല് സൂപ്പര് താരം നെയ്മര് കുട്ടീഞ്ഞോ പാരിസിലെത്തുന്നതില് സന്തോഷവാനാണെന്നും റിപ്പോര്ട്ടില് പറയുന്നു. ദേശീയ ടീമില് ഒരുമിച്ചു കളിക്കുന്ന ഇരുവരും അടുത്ത സുഹൃത്തുക്കളും കൂടിയാണ്. ജനുവരി ട്രാന്സ്ഫര് ജാലകത്തിലൂടെ ഫ്രഞ്ച് സെന്സേഷന് നൗകാംപിലെത്തുമോ എന്നാണ് ഫുട്ബോള് ലോകം ഉറ്റുനോക്കുന്നത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
