അബുദാബി: ഡിവില്ലിയേഴ്‌സിന്റെ മിഡില്‍ സ്റ്റംപ് ഇളക്കിയ ഹൈദരാബാദ് പേസര്‍ നടരാജന്റെ യോര്‍ക്കറായിരുന്നു എലിമിനേറ്ററിലെ ഹൈലൈറ്റുകളില്‍ ഒന്ന്. ക്രിക്കറ്റ് ലോകത്തിന്റെ കയ്യടി വാങ്ങിയ യോര്‍ക്കര്‍ നടരാജനില്‍ നിന്ന് വന്നത് കുഞ്ഞ് ജനിച്ച സന്തോഷത്തില്‍ നില്‍ക്കുമ്പോള്‍.
ബാംഗ്ലൂരിന് എതിരായ മത്സരത്തിന് ശേഷം ഹൈദരാബാദ് ക്യാപ്റ്റന്‍ ഡേവിഡ് വാര്‍ണറാണ് നടരാജന് ആദ്യ കണ്‍മണി ജനിച്ച സന്തോഷം പങ്കുവെച്ചത്. വെള്ളിയാഴ്ച രാവിലെയാണ് നടരാജന് കുഞ്ഞ് ജനിച്ചത്. നടരാജനും ഭാര്യക്കും അഭിനന്ദനങ്ങള്‍, അവര്‍ക്ക് ഇന്ന് രാവിലെ കുഞ്ഞ് പിറന്നു. കുഞ്ഞിന് എന്ത് നല്ല സമ്മാനം, ഡേവിഡ് വാര്‍ണര്‍ പറഞ്ഞു...
18ാം ഓവറിലാണ് ഡിവില്ലിയേഴ്‌സിനെ നടരാജന് മടക്കിയത്. സ്ലോട്ടില്‍ പിച്ച് ചെയ്ത് എത്തിയ യോര്‍ക്കര്‍ ഡിവില്ലിയേഴ്‌സിന്റെ കണക്കുകൂട്ടല്‍ തെറ്റിച്ച് സ്റ്റംപ് പിഴുതു. അവസാന ഓവറുകളില്‍ റണ്‍റേറ്റ് ഉയര്‍ത്തുന്നതില്‍ നിന്ന് ഇത് ബാംഗ്ലൂരിനെ വീണ്ടും പിന്നോട്ടടിച്ചു.
ഡിവില്ലിയേഴ്‌സിന്റേയും വാഷിങ്ടണ്‍ സുന്ദറിന്റേയും വിക്കറ്റ് ഒരോവറില്‍ നടരാജന് വീഴ്ത്തി. കളിയില്‍ ബാംഗ്ലൂര്‍ മുന്‍പില്‍ വെച്ച 132 റണ്‍സ് വിജയ ലക്ഷ്യം ആറ് വിക്കറ്റ് കയ്യില്‍ വെച്ച് രണ്ട് പന്തുകള്‍ ശേഷിക്കെ ഹൈദരാബാദ് മറികടന്നു. ഞായറാഴ്ച ഡല്‍ഹിക്കെതിരെ ഹൈദരാബാദ് രണ്ടാം ക്വാളിഫയര്‍ കളിക്കാന്‍ ഇറങ്ങും.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
