നായയുടെ ദേഹത്ത് ഇന്ത്യന്‍ പതാക പതിച്ച് ബംഗ്ലാദേശ് ആരാധകര്‍;കളത്തിന് പുറത്തെ ആരാധകരുടെ പോര് തുടങ്ങി

ഇന്ത്യയും പാക്കിസ്ഥാനും തമ്മിലുള്ള ക്രിക്കറ്റ് മത്സരത്തിന്റെ ആവേശത്തിന് ഒപ്പം വരില്ല ഇന്ത്യയും ബംഗ്ലാദേശുമായുള്ള മത്സരം. എന്നാല്‍ ബംഗ്ലാദേശുകാര്‍ക്ക് ഇന്ത്യയുമായുള്ള മത്സരം ആവേശ പോരാട്ടം തന്നെയാണ്. പക്ഷെ ബംഗ്ലാദേശുകാരുടെ ആവേശം ഇന്ത്യന്‍ പതാകയെ അപമാനിക്കുന്ന രീതിയിലേക്ക് മാറിയെന്നാണ് ഇപ്പോള്‍ വിമര്‍ശനം ഉയരുന്നത്. 

ബംഗ്ലാദേശിന്റെ പതാക പതിച്ച കടുവ ഇന്ത്യയുടെ പതാക പതിച്ച നായയ്ക്ക് നേരെ ചാടി വീഴുന്ന ചിത്രമാണ് സമൂഹ മാധ്യമങ്ങളില്‍ വ്യാപകമായി പ്രചരിക്കുന്നത്. വ്യാഴാഴ്ചയാണ് ഇന്ത്യയും ബംഗ്ലാദേശും തമ്മിലുള്ള സെമി ഫൈനല്‍ പോരാട്ടം. 

ഇത് ആദ്യമായല്ല ഇന്ത്യക്കാരെ അപമാനിക്കുന്ന രീതിയില്‍ ബംഗ്ലാദേശുകാര്‍ പ്രതികരിക്കുന്നത്. കഴിഞ്ഞ വര്‍ഷത്തെ ഏഷ്യ കപ്പ് ഫൈനലിന് മുന്‍പ് ധോനിയുടെ തല വെട്ടിയെടുത്ത രീതിയില്‍ പിടിച്ചു നില്‍ക്കുന്ന തസ്‌കിന്‍ അഹ്മദിന്റെ ചിത്രവും വിവാദമായിരുന്നു. 

2015ല്‍ കട്ടറിന്റെ വ്യാജ പരസ്യം നല്‍കി ബംഗ്ലാദേശി പത്രവും ഇന്ത്യന്‍ താരങ്ങളെ അപമാനിച്ചിരുന്നു. ധോനി, കോഹ്ലി, ധവാന്‍, രഹാനെ, രോഹിത് ശര്‍മ ഉള്‍പ്പെടെയുള്ള ഇന്ത്യന്‍ താരങ്ങളുടെ മുടി പകുതി മുറിച്ച് നില്‍ക്കുന്ന രീതിയിലായിരുന്നു ചിത്രം പത്രത്തില്‍ നല്‍കിയത്.