പെപ് ​ഗെർഡിയോളയുടെ അമ്മ കോവിഡ് ബാധിച്ച് മരിച്ചു

ബാഴ്സലോണ: മാഞ്ചസ്റ്റർ സിറ്റി മുഖ്യ പരിശീലകൻ പെപ് ​ഗെർഡിയോളയുടെ അമ്മ ഡൊളോഴ്സ് സല കാരിയോ (82) കോവിഡ് 19 ബാധിച്ച് മരിച്ചു. മാഞ്ചസ്റ്റർ സിറ്റി അവരുടെ ഔദ്യോഗിക ട്വിറ്റർ അക്കൗണ്ടിലൂടെയാണ് ഇക്കാര്യമറിയിച്ചത്. 

ബാഴ്സലോണയിലെ ആശുപത്രിയിൽ ചികിത്സയിലായിരുന്നു പെപിന്റെ അമ്മ. ​ഗെർഡിയോളയുടെയും കുടുംബാംഗങ്ങളുടെയും സുഹൃത്തുക്കളുടെയും ദുഃഖത്തിൽ പങ്കുചേരുന്നതായി മാഞ്ചസ്റ്റർ സിറ്റി അധികൃതർ അറിയിച്ചു. ക്ലബ്ബിന്റെ ബദ്ധവൈരികളായ മാഞ്ചസ്റ്റർ യുനൈറ്റഡ്, ലിവർപൂൾ, ടോട്ടനം ഹോട്സ്പർ ടീമുകളും അനുശോചനമറിയിച്ചിട്ടുണ്ട്. 

നേരത്തേ, കോവിഡിനെതിരായ പ്രതിരോധ ശ്രമങ്ങൾക്ക് പിന്തുണയുമായി ​ഗെർഡിയോള എത്തിയിരുന്നു. മെഡിക്കൽ ഉപകരണങ്ങൾ വാങ്ങി വിതരണം ചെയ്യുന്നതിന് ഏയ്ഞ്ചൽ സോളെർ ഡാനിയേൽ ഫൗണ്ടേഷന് 10 ലക്ഷം യുറോ ആണ് ​ഗെർഡിയോള നൽകിയത്. കാറ്റലോണിയയിലെ വിവിധ ആശുപത്രികൾക്ക് മാസ്ക്, ഗ്ലൗസ് തുടങ്ങിയവ വിതരണം ചെയ്യാനാണ് ഈ തുക ഉപയോഗിച്ചത്.