പോണ്ടിങ് കലിപ്പിലാണ്; ഹോം ​​ഗ്രൗണ്ട് അത്ഭുതപ്പെടുത്തി; വിമർശനം

ന്യൂഡൽഹി: ഐപിഎല്ലിൽ അഞ്ച് കളികളിൽ നിന്ന് രണ്ട് ജയവും മൂന്ന് തോ‌‍ൽവിയുമാണ് ഡൽഹി ക്യാപിറ്റൽസ് സ്വന്തമാക്കിയത്. കഴിഞ്ഞ ദിവസം സൺറൈസേഴ്സ് ഹൈദരാബാദിനോട് സ്വന്തം മൈതാനത്ത് അവർക്ക് തോൽവി വഴങ്ങേണ്ടി വന്നു. കളിയുടെ സമസ്ത മേഖലകളിലും ക്യാപിറ്റൽസ് പിന്നോക്കം പോയി. 

ഹോം ​ഗ്രൗണ്ടിൽ ടീമിനായി ഒരുക്കുന്ന പിച്ചിനെ സംബന്ധിച്ച് പരാതിയുമായി എത്തിയിരിക്കുകയാണ് ഡൽ​ഹി പരിശീലകൻ റിക്കി പോണ്ടിങ്. 
ഹോം ഗ്രൗണ്ടായ ഫിറോസ് ഷാ കോട്‌ലയിലെ വിക്കറ്റ് ഡല്‍ഹിയെ തുണയ്ക്കാത്തതാണ് മുന്‍ ഓസീസ് നായകനെ പ്രകോപിപ്പിച്ചത്. പിച്ച് സണ്‍റൈസേഴ്‌സ് ഹൈദരാബാദിനെ തുണയ്ക്കുന്നതായിരുന്നു എന്നാണ് മത്സര ശേഷം അദ്ദേഹം പ്രതികരിച്ചത്. 

ഈ പിച്ച് അത്ഭുതപ്പെടുത്തുന്നതാണ്. മത്സരത്തിനു മുൻപ് ക്യൂറേറ്ററുമായി സംസാരിച്ചിരുന്നു. ഈ സീസണിലെ ഏറ്റവും മികച്ച വിക്കറ്റായിരിക്കുമെന്നാണ് കരുതിയത്. എന്നാല്‍ സംഭവിച്ചത് നേരെ തിരിച്ചും. ഇതൊന്നും ശരിയല്ലെന്നും പോണ്ടിങ് പറഞ്ഞു. വളരെ വേ​ഗം കുറഞ്ഞ പിച്ചാണ്. ഹൈദരാബാദ് മാന്യമായി പന്തെറിഞ്ഞു. പിച്ചിന്റെ വേ​ഗക്കുറവ് സ്ലോ ബൗളർമാർ സമർഥമായി ഉപയോ​ഗിച്ചതായും പോണ്ടിങ് പ്രതികരിച്ചു. നേരത്തെയും ഡല്‍ഹി പിച്ചിനെതിരേ വിമര്‍ശനം ഉയര്‍ന്നിരുന്നു.