ലോക വെയിറ്റ്ലിഫ്റ്റിങ് ചാമ്പ്യന്ഷിപ്പില് മെഡല് നേടാന് ഇന്ത്യയുടെ മീരാബായി സായ്കോം ചാനുവിനായില്ല. എന്നാല്, ഭാരോദ്വഹനത്തില് മറ്റൊരു ഇന്ത്യന് വനിതാ താരത്തിനും സാധിക്കാത്ത നേട്ടം മീരാബായ് സ്വന്തമാക്കി. തന്റെ ശരീരഭാരത്തിന്റെ നാല് മടങ്ങ് അധികം ഭാരമാണ് താരം എടുത്തുയര്ത്തിയത്.
49 കിഗ്രാം വിഭാഗത്തില് 201 കിഗ്രാം ഭാരം എന്ന മാന്ത്രിക സംഖ്യയിലേക്കാണ് മീരാബായി എത്തിയത്. 200കിഗ്രാം എന്ന സംഖ്യ മറികടക്കുന്ന ആദ്യ ഇന്ത്യന് വനിതാ താരമാണ് മീരാബായി. തന്റെ തന്നെ റെക്കോര്ഡായ 199 കിഗ്രാം എന്ന നേട്ടമാണ് മീരാഭായി ഇവിടെ മറികടന്നത്. ഈ വര്ഷം ചൈനയില് നടന്ന ഏഷ്യന് ചാമ്പ്യന്ഷിപ്പിലായിരുന്നു ഈ നേട്ടം.
ലോക ചാമ്പ്യന്ഷിപ്പില് നാലാമതെത്താനെ മീരാബായി ചാനുവിനായുള്ളു. 212 കിഗ്രാം എടുത്തുയര്ത്തി ചൈനയുടെ ജിയാങ് ഹുയ്ഹായാണ് സ്വര്ണം നേടിയത്. നാലാം സ്ഥാനത്തെത്തിയതോടെ ടോക്യോ ഒളിംപിക്സിലേക്ക് യോഗ്യത നേടുന്നതിനുള്ള സാധ്യതകളും മീരാബായി സജീവമായി നിലനിര്ത്തി.
ടോക്യോ ഒളിംപിക്സിനുള്ള ക്വളിഫിക്കേഷന് സൈക്കിളിന്റെ റാങ്കിങ് 2020 ഏപ്രിലില് ലോക വെയിറ്റ്ലിഫ്റ്റിങ് ഫെഡറേഷന് പുറത്തുവിടും. 49കിഗ്രാം വിഭാഗത്തില് ലോക റാങ്കിങ്ങില് മൂന്നാമതാണ് മീരാഭായി. 14 താരങ്ങള്ക്കാണ് ഒളിംപിക്സിലെ വെയിറ്റ് ലിഫ്റ്റിങ്ങില് പോരിനിറങ്ങാനാവുക. അതില് 13 പേരും വരിക ലോക റാങ്കിങ്ങിന്റെ അടിസ്ഥാനത്തില്. ആതിഥേയരായ ജപ്പാന് മാത്രമാണ് ഒരു താരത്തെ നാമനിര്ദേശം ചെയ്യാനാവുക.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
