'വിരമിക്കുന്നതിനെക്കുറിച്ച് ചിന്തിക്കുകയേ വേണ്ട'; ധോണിയോട് ലത മങ്കേഷ്‌കര്‍

ലോകകപ്പിന് ശേഷം മഹേന്ദ്രസിങ് ധോണി ക്രിക്കറ്റില്‍ നിന്ന് വിരമിക്കുമെന്ന് നേരത്തെ മുതല്‍ റിപ്പോര്‍ട്ടുകളുണ്ട്. ലോകകപ്പ് സെമിയില്‍ ന്യൂസിലന്‍ഡിനോട് തോറ്റ് ഇന്ത്യ പുറത്തായതോടെ ധോണിയുടെ വിരമിക്കലും ചര്‍ച്ചയായിരിക്കുകയാണ്. ടീമിനെ വിജയിപ്പിക്കാനാവാത്തതിന്റെ നിരാശയോടെയാണ് ധോണി കളം വിട്ടത്. താരത്തിന്റെ വിരമിക്കല്‍ ചര്‍ച്ചയാവുന്നതിനിടെ ധോണിയ്ക്ക് പിന്തുണയുമായി രംഗത്തെത്തിയിരിക്കുകയാണ് പ്രമുഖ ഗായിക ലത മങ്കേഷ്‌കര്‍. 

ഇപ്പോഴൊന്നും വിരമിക്കലിനെക്കുറിച്ച് ചിന്തിക്കരുതെന്നാണ് ലത മങ്കേഷ്‌കര്‍ ധോണിയോട് ആവശ്യപ്പെട്ടിരിക്കുന്നത്. രാജ്യത്തിന് താങ്കളെപ്പോലെയുള്ള ക്രിക്കറ്റ് താരത്തെ ആവശ്യമാണെന്നും ട്വിറ്ററിലൂടെ ഗായിക പറഞ്ഞു. 'നമസ്‌കാരം എംഎസ് ധോണി ജി. നിങ്ങള്‍ റിട്ടയര്‍ ചെയ്യാന്‍ ഒരുങ്ങുന്നതായി ഞാന്‍ കേട്ടു. ദയവായി അങ്ങനെയൊന്നും ചിന്തിക്കരുത്. രാജ്യത്തിന് നിങ്ങളുടെ കളി ആവശ്യമാണ്. വിരമിക്കുന്നതിനെക്കുറിച്ചുള്ള ചിന്തപോലും നിങ്ങള്‍ക്കുണ്ടാവരുതെന്നും ഞാന്‍ അഭ്യര്‍ത്ഥിക്കുന്നു.' ലത മങ്കേഷ്‌കര്‍ കുറിച്ചു. 

ന്യൂസിലന്‍ഡിന്റെ 240 റണ്‍സ് പിന്തുടര്‍ന്ന ഇന്ത്യയ്ക്ക് തുടക്കത്തിലെ മുന്‍നിരയെ നഷ്ടമായിരുന്നു. ഏഴാം വിക്കറ്റില്‍ ധോണിയും (50) ജഡേജയും (77) ചേര്‍ന്നുള്ള 116 റണ്‍സിന്റെ കൂട്ടുകെട്ടാണ് മെച്ചപ്പെട്ട സ്‌കോറിലേക്ക് ഇന്ത്യയെ എത്തിച്ചത്. എന്നാല്‍ ഇരുവരും പുറത്തായതോടെ ഇന്ത്യ പരാജയം സമ്മതിക്കുകയായിരുന്നു.