കിമ്പര്‍ലി : ദക്ഷിണാഫ്രിക്കയ്‌ക്കെതിരായ ഏകദിന പരമ്പര ഇന്ത്യ സ്വന്തമാക്കി.പരമ്പരയിലെ രണ്ടാം മത്സരത്തിലും ഇന്ത്യയ്ക്ക് വിജയം. ഇതോടെ മൂന്ന് മത്സരങ്ങളുടെ പരമ്പര ഇന്ത്യ നേടി. കിമ്പര്‍ലിയില്‍ നടന്ന രണ്ടാം ഏകദിനത്തില്‍ 188 റണ്‍സിനായിരുന്നു മിഥാലി രാജും സംഘവും ദക്ഷിണാഫ്രിക്കയെ തറപറ്റിച്ചത്. ആദ്യം ബാറ്റ് ചെയ്ത ഇന്ത്യ നിശ്ചിത 50 ഓവറില്‍ 302/3 എന്ന സ്‌കോര്‍ ഉയര്‍ത്തിയപ്പോള്‍ ദക്ഷിണാഫ്രിക്കന്‍ വനിതകള്‍ 30.5 ഓവറില്‍ 124 റണ്‍സിന് ആള്‍ഔട്ടാവുകയായിരുന്നു.
സെഞ്ച്വറി നേടിയ ഓപ്പണര്‍ സ്മൃതി മന്ദാനയും (135), അര്‍ദ്ധ സെഞ്ച്വറികള്‍ നേടിയ ഹര്‍മന്‍പ്രീത് കൗറും (55 നോട്ടൗട്ട്), വേദകൃഷ്ണ മൂര്‍ത്തിയും (51 നോട്ടൗട്ട്) ചേര്‍ന്നാണ് ഇന്ത്യയെ ഉയര്‍ന്ന സ്‌കോറിലെത്തിച്ചത്. 129 പന്തുകള്‍ നേരിട്ട സ്മൃതി 14 ബൗണ്ടറികളും ഒരു സിക്‌സും പറത്തി. ആദ്യ ഏകദിനത്തില്‍ സ്മൃതി 84 റണ്‍സ് നേടിയിരുന്നു. തുടര്‍ച്ചയായ രണ്ടാം മത്സരത്തിലും സ്മൃതി പ്‌ളേയര്‍ ഒഫ് ദ മാച്ചായി. മറുപടി ബാറ്റിംങിന് ഇറങ്ങിയ ദക്ഷിണാഫ്രിക്കയെ നാലു വിക്കറ്റ് വീഴ്ത്തിയ പൂനം യാദവും രണ്ട് വിക്കറ്റ് വീതം വീഴ്ത്തിയ രാജേശ്വരി ഗേയ്ക്ക് വാദും ദീപ്തിശര്‍മ്മയും ചേര്‍ന്നാണ് ചുരുട്ടികൂട്ടിയത്.
ഏകദിനത്തില്‍ 200 വിക്കറ്റുകള്‍ തികയ്ക്കുന്ന ആദ്യ വനിതാ ക്രിക്കറ്റര്‍ എന്ന റെക്കാഡ് ഇന്ത്യന്‍ പേസര്‍ ജുലാന്‍ ഗോസ്വാമി സ്വന്തമാക്കി. ദക്ഷിണാഫ്രിക്കയ്‌ക്കെതിരായ രണ്ടാം ഏകദിനത്തില്‍ ഓപ്പണര്‍ ലോറ വോള്‍വാര്‍ട്ടിനെ പുറത്താക്കിയാണ് ജുലാന്‍ 200വിക്കറ്റ് തികച്ചത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
