സൂര്യാസ്തമയം ആസ്വദിച്ച് അനുഷ്കയും കോഹ്‌ലിയും; എബിഡി പകർത്തിയത് ഏറ്റവും റൊമാന്റിക് ചിത്രമെന്ന് ആരാധകർ 

ക്രിക്കറ്റിൽ മാത്രമല്ല, ഫോട്ടോഗ്രാഫിയിലും ഒട്ടും പിന്നിലല്ലെന്ന് തെളിയിക്കുകയാണ് ആരാധകരുടെ എബിഡി. ഐപിഎൽ മത്സരങ്ങൾ മുറുകുന്നതിനിടയിൽ ബാംഗ്ലൂർ നായകനായ വിരാട് കോഹ്ലിയുടെയും ഭാര്യയും ബോളിവുഡ് നടിയുമായ അനുഷ്കയുടെയും ഒരു മനോഹര ചിത്രം പകർത്തിയിരിക്കുകയാണ് ഡിവില്ലിയേഴ്സ്. പ്രണയാർദ്രരായി ദുബായിലെ തടാകത്തിൽ കുളിക്കുന്നതിൻറെ ചിത്രമാണ് താരം ക്യാമറയിലാക്കിയത്. 

കൊഹ്ലി സമൂഹമാധ്യമങ്ങളിലൂടെ ചിത്രം പങ്കുവച്ചതിന് പിന്നാലെ താരദമ്പതികളുടെ ഏറ്റവും റൊമാന്റിക് ചിത്രമാണിതെന്നാണ് ആരാധകർ പറയുന്നത്. പ്രിയ സുഹൃത്ത് എ ബി ഡിവില്ലിയേഴ്സിന് ചിത്രത്തിൻറെ ക്രെഡിറ്റ് കൊടുക്കാനും കോഹ്ലി മറന്നില്ല.

ഫോട്ടോയിൽ കമന്റുമായി ഡിവില്ലിയേഴ്സും എത്തിയതോടെ ആരാധകർക്ക് ഇരട്ടിയാവേശമായി. അരലക്ഷത്തിലധികം ലൈക്കുകളാണ് താരത്തിന്റെ കമന്റിന് ലഭിച്ചത്.