ന്യൂഡല്ഹി: വ്യാജ അശ്ലീല ഉള്ളടക്കങ്ങളുള്ള ആന്ഡ്രോയ്ഡ് ആപ്പുകള് വഴി സാമ്പത്തികത്തട്ടിപ്പുകള് കൂടുന്നതായി കേന്ദ്ര ആഭ്യന്തര മന്ത്രാലയം. ഫെയ്സ്ബുക്ക്, ഇന്സ്റ്റഗ്രാം തുടങ്ങിയ സാമൂഹികമാധ്യമങ്ങളിലൂടെ പരസ്യങ്ങളും ലിങ്കുകളും ഉപയോഗിച്ചാണ് ആപ്പുകള് പ്രചരിപ്പിക്കുന്നതെന്ന് നാഷണല് സൈബര്ക്രൈം ത്രെട്ട് അനലിറ്റിക്സ് യൂണിറ്റ് (എന്സിടിഎയു) അറിയിച്ചു.
നൈറ്റ്പ്ലേ, റീലൂപ്, കിസ്, വിമോ, റിവോ, നെക്സോ, വിക്സ തുടങ്ങിയ പേരുകളിലുള്ള ആപ്പുകളും സമാന സ്വഭാവത്തിലുള്ള മറ്റ് ആപ്പുകള് തട്ടിപ്പിനായി ഉപയോഗിക്കുന്നുണ്ടെന്ന് ആഭ്യന്തരമന്ത്രാലയം മുന്നറിയിപ്പില് പറഞ്ഞു.
ഫെയ്സ്ബുക്ക്, ഇന്സ്റ്റഗ്രാം എന്നിവയില് പ്രത്യക്ഷപ്പെടുന്ന അശ്ലീല ഉള്ളടക്കമുള്ള പരസ്യങ്ങളിലൂടെയും ലിങ്കുകളിലൂടെയുമാണ് ഉപയോക്താക്കളെ ആദ്യം ആകര്ഷിക്കുന്നത്. തുടര്ന്ന് ഇവരെ അശ്ലീലവെബ്സൈറ്റുകളിലേക്ക് തിരിച്ചുവിടും. അവിടെനിന്ന് ഗൂഗിള് പ്ലേ സ്റ്റോറിന് പുറത്തുള്ള ആന്ഡ്രോയ്ഡ് പാക്കേജ് കിറ്റ് (എപികെ) ഫയല് ഡൗണ്ലോഡ് ചെയ്യാന് പ്രേരിപ്പിക്കുകയാണ് രീതി.
ആദ്യത്തെ ആപ്ലിക്കേഷന് ഇന്സ്റ്റാള് ചെയ്തശേഷം ആപ്പിന്റെ അപ്ഡേറ്റെന്നപേരില് രണ്ടാമതൊരു പാക്കേജുകൂടി ഡൗണ്ലോഡ് ചെയ്യിക്കാനും സാധ്യതയുണ്ട്. ആദ്യ ആപ്പിന് ലഭിച്ച അനുമതികള് ദുരുപയോഗം ചെയ്താണിത്. തുടര്ന്ന് സുപ്രധാന അനുമതികള് നല്കാന് ഉപയോക്താക്കളോട് ആവശ്യപ്പെടും. ഇത്തരം അനുമതികള് നല്കിയാല് ആപ്പിന് ഫോണിന്റെ നിയന്ത്രണം പൂര്ണമായി ഏറ്റെടുക്കാന് കഴിയുമെന്നും എന്സിടിഎയു മുന്നറിയിപ്പുനല്കി.
ചില ആപ്പുകള് വെര്ച്വല് പ്രൈവറ്റ് നെറ്റ്വര്ക്ക് (വിപിഎന്) ഫോണില് ഇന്സ്റ്റാള് ചെയ്യാനും സാധ്യതയുണ്ട്. ഇതുവഴി ഉപയോക്താവിന്റെ ഇന്റര്നെറ്റ് ട്രാഫിക്, തട്ടിപ്പുകാര് നിയന്ത്രിക്കുന്ന സെര്വറുകളിലൂടെ തിരിച്ചുവിടാന് കഴിയുമെന്നും അധികൃതര് പറഞ്ഞു.
