ആഗോളതലത്തില്‍ വിഷാദ രോഗികളുടെ എണ്ണം ദിനംപ്രതി വര്‍ധിച്ചുവരികയാണ്, പ്രത്യേകിച്ച് കൗമാരക്കാര്‍ക്കിടയില്‍. അതിന്‍റെ ഒരു പ്രധാന കാരണം രാത്രി വൈകിയുള്ള ഉറക്കമാണെന്ന് പഠനങ്ങള്‍ ചൂണ്ടിക്കാട്ടുന്നു. രാത്രി വൈകി ഉറങ്ങുന്നവരില്‍ വിഷാദം എങ്ങനെ ട്രിഗര്‍ ആകുന്നുയെന്നത് വ്യക്തമാക്കുകയാണ് യുകെയിലെ സറേ സര്‍വകലാശാല ഗവേകര്‍.
ഓണ്‍ലൈനിലൂടെ നടത്തിയ സര്‍വെയില്‍ 546 കൗമാരക്കാരുടെ ക്രോണോടൈപ്പുകള്‍ (ആളുകളുടെ സ്വാഭാവിക ഉറക്ക-ഉണര്‍വ് ചക്രങ്ങള്‍ക്ക് ഉണ്ടാകാവുന്ന വ്യതിയാനങ്ങളെ വേര്‍തിരിക്കാന്‍ ഉപയോഗിക്കുന്നത്) വിലയിരുത്തി. ഇതില്‍ 252 പേര്‍ക്കും രാത്രി വൈകി ഉറങ്ങാന്‍ ഇഷ്ടപ്പെടുന്നവരായിരുന്നു. ക്രോണോടൈപ്പിന് ഒരു ജനിതക അടിസ്ഥാനമുണ്ട്. അതിനാല്‍ വൈകി ഉറങ്ങുന്നവരില്‍ അതൊരു സ്വഭാവിക ജൈവിക പ്രവണതയാണ്. ഈ ജൈവിക പ്രവണത തടസപ്പെടുമ്പോള്‍ അല്ലെങ്കില്‍ സമ്മര്‍ദങ്ങള്‍ ഉണ്ടാകുമ്പോഴാണ് വൈകി ഉറങ്ങുന്നവരില്‍ വിഷാദം പലപ്പോഴും ട്രിഗര്‍ ആവുകയെന്ന് പിഎല്‍ഒഎസ് വണ്ണില്‍ പ്രസിദ്ധീകരിച്ച് പഠനത്തില്‍ പറയുന്നു
38 പേര്‍ മാത്രമാണ് രാവിലെ നേരത്തെ ഉണരാന്‍ ഇഷ്ടപ്പെട്ടിരുന്നത്. ഇവര്‍ മോര്‍ണിങ് ക്രോണോടൈപ്പ് പ്രവണത പ്രകടമാക്കി. 256 പേര്‍ ഒരു ഇന്റര്‍മീഡിയറ്റ് സ്ലീപ്-വേക്ക് സൈക്കിള്‍ ഉള്ളവരായിരുന്നു. പഠനത്തില്‍ പങ്കെടുത്തവരുടെ പ്രായം 20ന് താഴെയായതിനാല്‍ ക്രോണോടൈപ്പുകള്‍ ഇത്തരത്തിലായതില്‍ അതിശയിക്കാനില്ലെന്നാണ് ഗവേഷകര്‍ പറയുന്നത്. കൗമാരത്തിന്‍റെ അവസാനത്തിൽ ആളുകൾ ലേറ്റ്- ക്രോണോടൈപ്പിലേക്ക് വീഴാൻ സാധ്യതയുണ്ട്. അതേസമയം മോര്‍ണിങ് ക്രോണോടൈപ്പിലേക്ക് പിന്നീട് തിരിച്ചു വരാനും സാധ്യതയുണ്ട്.
പഠനത്തില്‍ പങ്കെടുത്തവരുടെ ഉറക്കത്തിന്റെ ഗുണനിലവാരം, അമിത ചിന്ത, (നെഗറ്റീവ് വികാരങ്ങളിലും ചിന്തകളിലും മുഴുകുന്ന പ്രവണത), വിഷാദം, ഏകാഗ്രത, മദ്യപാനം എന്നിവയെ സംബന്ധിച്ചും വിലയിരുത്തി. വിഷാദം ലേറ്റ്- ക്രോണോടൈപ്പ് ഉള്ളവരെ സ്വാധീനിക്കാം. ഇത് രാവിലെ കിടക്കയിൽ നിന്ന് എഴുന്നേൽക്കാനുള്ള പ്രചോദനം കണ്ടെത്തുന്നില്‍ കൂടുതല്‍ പ്രയാസപ്പെടുകയും രാത്രി നെഗറ്റീവ് ചിന്തകള്‍ വര്‍ധിച്ച് ഉറങ്ങാൻ കഴിയാതെ വരികയും ചെയ്യുന്നു. ലേറ്റ്-ക്രോണോടൈപ്പ് ഉള്ളവരില്‍ അമിത ചിന്ത ഉയർന്ന അളവില്‍ റിപ്പോര്‍ട്ട് ചെയ്യപ്പെട്ടിട്ടുണ്ടെന്നും ഗവേഷകര്‍ പറയുന്നു.
അല്ലെങ്കില്‍ തൊഴില്‍, പഠനം, സാമൂഹിക ജീവിതം എന്നിവയെ തുടര്‍ന്നുള്ള ആവശ്യങ്ങള്‍ ലേറ്റ്-ക്രോണോടൈപ്പ് ഉള്ളവരുടെ ഉറക്കം നഷ്ടപ്പെടുത്താം. പലപ്പോഴും അവരുടെ സ്വഭാവത്തിന് വിരുദ്ധമായി രാവിലെ നേരത്തെ എഴുന്നേല്‍ക്കാന്‍ അവരെ നിര്‍ബന്ധിതരാക്കാം. അല്ലെങ്കില്‍ ശരീരം സഹകരിക്കുന്നതിലും നേരത്തെ ഉറങ്ങാൻ ആവശ്യപ്പെടുന്നു. ഈ അവസ്ഥ ഒടുവിൽ ഒരു വ്യക്തിയുടെ മാനസികാരോഗ്യത്തെ തളർത്തിയെക്കാം.
വിഷാദരോഗ സാധ്യതയും ക്രോണോടൈപ്പും തമ്മിലുള്ള ബന്ധം ലഘൂകരിക്കുന്നതിന് ചില ടെക്നിക്കുകള്‍ പരിശീലിക്കാം.
മൈൻഡ്ഫുൾനെസ്
മൈന്‍ഡ്ഫുള്‍നെസ് പരിശീലിക്കുന്നത് വൈകി ഉറങ്ങുന്നവരില്‍ വിഷാദത്തിന്‍റെ സ്വാധീനം കുറയ്ക്കാന്‍ സഹായിക്കും. വികാര
ങ്ങളെയും ചിന്തകളെയും ലേബൽ ചെയ്യാനുള്ള കഴിവ് പരിശീലിച്ചെടുക്കേണ്ടതാണ്.
ഉറക്കത്തിന്റെ ഗുണനിലവാരം
മികച്ച ഉറക്കം ക്ഷീണം, അശ്രദ്ധ, മനസ്സിന്റെ അലഞ്ഞുതിരിയൽ എന്നിവയ്ക്കുള്ള സാധ്യത കുറയ്ക്കുന്നു, ഇത് ആളുകൾക്ക് വർത്തമാനകാലത്ത് നന്നായി ശ്രദ്ധ കേന്ദ്രീകരിക്കാനുള്ള കഴിവ് അനുവദിക്കുന്നു.
മദ്യപാനം
മദ്യത്തിന്റെ ഉപഭോഗവും ഒരു പ്രധാന മധ്യസ്ഥ ഘടകമാണ്. രാത്രി വൈകി ഉറങ്ങുന്നവരില്‍ മദ്യപിക്കാനുള്ള പ്രവണത കൂടുതലാണെന്ന് പഠനത്തില്‍ കണ്ടെത്തിയിരുന്നു. മദ്യപാനം കുറയ്ക്കുന്നത് വിഷാദ സാധ്യത കുറയ്ക്കും.
സാമൂഹിക ബന്ധങ്ങള്‍
സുഹൃത്തുക്കള്‍ക്കും കുടുംബത്തിനുമൊപ്പം സമയം ചെലവഴിക്കുന്നത് ആളുകളില്‍ വിഷാദ സാധ്യത കുറയ്ക്കുമെന്ന് പഠനങ്ങള്‍ പറയുന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
വാര്‍ത്തകള്‍ അപ്പപ്പോള്‍ ലഭിക്കാന്‍ സമകാലിക മലയാളം ആപ് ഡൗണ്‍ലോഡ് ചെയ്യുക
