മുംബൈ: നവംബർ 25 ന് വില പ്രഖ്യാപിക്കാനിരിക്കെ ടാറ്റ മോട്ടോഴ്സ് പുതിയ സിയറയെ ഇന്ത്യയിൽ ഔദ്യോഗികമായി പ്രദർശിപ്പിച്ചു. ഐസിഇ മോഡലാണ് അവതരിപ്പിച്ചത്. ഇവി പതിപ്പ് ഉടൻ പുറത്തിറങ്ങും.

പുതിയ എസ് യുവിയുടെ ഇന്റീരിയർ കമ്പനി രഹസ്യമാക്കി വെച്ചിരിക്കുകയായിരുന്നു. എന്നാൽ പുറത്തുവന്ന പുതിയ വിവരങ്ങൾ അനുസരിച്ച് മഹീന്ദ്ര XEV 9e യ്ക്ക് സമാനമായി ടാറ്റയുടെ ആദ്യത്തെ മൂന്ന്-സ്‌ക്രീൻ ഡാഷ്ബോർഡ് ലേഔട്ട് സിയറയിൽ ഉൾപ്പെടുത്തും. കൂടാതെ എസി കൺട്രോളുകൾക്കുള്ള ടച്ച് പാനൽ, പനോരമിക് ഗ്ലാസ് റൂഫ്, 360-ഡിഗ്രി കാമറ, പവർഡ്, വെന്റിലേറ്റഡ് ഫ്രണ്ട് സീറ്റുകൾ, ADAS സ്യൂട്ട് എന്നിവ ഉൾക്കൊള്ളുന്ന സാങ്കേതികവിദ്യയിൽ സമ്പന്നമായ ഒരു കാബിൻ അനുഭവം എസ്യുവി വാഗ്ദാനം ചെയ്യും. പുതിയ , തിളക്കമുള്ള ലോഗോയോട് കൂടിയ പുതിയ സ്റ്റിയറിങ് വീലാണ് മറ്റൊരു പ്രത്യേകത.

തുടക്കത്തിൽ സിയറയുടെ ഇവി പതിപ്പ് പുറത്തിറക്കാനാണ് ടാറ്റ പദ്ധതിയിട്ടിരുന്നത്. എന്നാൽ പുതിയ അപ്‌ഡേഷൻ അനുസരിച്ച് സിയറയുടെ ഐസിഇ വേരിയന്റ് ആണ് കമ്പനി ആദ്യം പുറത്തിറക്കുക. ഡീസൽ പവർട്രെയിനുകളിൽ മാത്രമായി പരിമിതപ്പെടുത്തിയിരിക്കുന്ന സഫാരി, ഹാരിയർ എന്നിവയിൽ നിന്ന് വ്യത്യസ്തമായി, ടാറ്റ സിയറ പെട്രോൾ, ഡീസൽ എൻജിൻ ഓപ്ഷനുകൾ വാഗ്ദാനം ചെയ്യാൻ സാധ്യതയുണ്ട്.

ടാറ്റ സിയറയിൽ ഐസിഇ പവർട്രെയിനുകൾ മാത്രമേ ലഭ്യമാകൂ. താഴ്ന്ന പെട്രോൾ വേരിയന്റുകളിൽ പുതിയ 1.5L നാച്ചുറലി ആസ്പിറേറ്റഡ് എൻജിനും ഉയർന്ന വേരിയന്റുകളിൽ പുതിയ 1.5L TGDi (ടർബോചാർജ്‍ഡ് ഗ്യാസോലിൻ ഡയറക്ട് ഇഞ്ചക്ഷൻ) മോട്ടോറും പ്രതീക്ഷിക്കുന്നു.

ഔദ്യോഗിക പവർ, ടോർക്ക് കണക്കുകൾ ഇതുവരെ പ്രഖ്യാപിച്ചിട്ടില്ല. എങ്കിലും, ടർബോ-പെട്രോൾ എഞ്ചിൻ 170PS പവറും 280Nm ടോർക്കും വാഗ്ദാനം ചെയ്യുമെന്ന് പ്രതീക്ഷിക്കുന്നു. ഡീസൽ പതിപ്പിൽ നെക്‌സോണിൽ നിന്ന് കടമെടുത്ത 1.5L ടർബോ എഞ്ചിൻ ഉണ്ടായിരിക്കാൻ സാധ്യതയുണ്ട്, പക്ഷേ ഉയർന്ന നിലവാരത്തിലാണ്. ട്രാൻസ്മിഷൻ തെരഞ്ഞെടുപ്പുകളിൽ 6-സ്പീഡ് മാനുവലും 7-സ്പീഡ് ഡിസിടി (ഡ്യുവൽ-ക്ലച്ച് ട്രാൻസ്മിഷൻ) ഓട്ടോമാറ്റിക് യൂണിറ്റും ഉൾപ്പെടും.