ന്യൂഡല്‍ഹി: പ്രമുഖ വാഹന നിര്‍മ്മാതാക്കളായ ബജാജ് ഓട്ടോ തങ്ങളുടെ സ്‌പോര്‍ട്ടി മോഡലായ പള്‍സര്‍ എന്‍160 ന്റെ പുതിയ വേരിയന്റ് ഇന്ത്യയില്‍ പുറത്തിറക്കി. മറ്റു വേരിയന്റുകളില്‍ കാണുന്ന ടെലിസ്‌കോപ്പിക് ഫോര്‍ക്കുകള്‍, സ്പ്ലിറ്റ് സീറ്റ് എന്നിവയില്‍ നിന്ന് വ്യത്യസ്തമായി അപ്സൈഡ്-ഡൗണ്‍ ഫ്രണ്ട് ഫോര്‍ക്കുകളും സിംഗിള്‍-പീസ് സീറ്റുമാണ് ഇതിന്റെ ഏറ്റവും വലിയ പ്രത്യേകത. ഈ പുതിയ വേരിയന്റിന് 1.24 ലക്ഷം രൂപയാണ് എക്‌സ്-ഷോറൂം (ഡല്‍ഹി) വില.

അപ്സൈഡ്-ഡൗണ്‍ ഫോര്‍ക്കുകള്‍ റൈഡിങ് കൂടുതല്‍ സുഖകരമാക്കും. റൈഡിങ് പ്രതലത്തില്‍ മികച്ച ഷോക്ക് അബ്‌സോര്‍പ്ഷന്‍ നല്‍കും എന്നതാണ് ഇതിന്റെ ഏറ്റവും വലിയ പ്രത്യേകത.പേള്‍ മെറ്റാലിക് വൈറ്റ്, റേസിങ് റെഡ്, പോളാര്‍ സ്‌കൈ ബ്ലൂ, ബ്ലാക്ക് എന്നിങ്ങനെ നാല് നിറങ്ങളില്‍ ഈ വേരിയന്റ് ലഭ്യമാകും. ഈ പതിപ്പിലെ ഗ്രാഫിക്‌സും മറ്റ് എല്ലാ വേരിയന്റുകളില്‍ നിന്നും അല്‍പ്പം വ്യത്യസ്തമാണ്.

15.7bhp പവറും 14.65Nm ടോര്‍ക്കും ഉല്‍പ്പാദിപ്പിക്കുന്ന 164.82cc, സിംഗിള്‍-സിലിണ്ടര്‍, ഓയില്‍-കൂള്‍ഡ് എന്‍ജിനാണ് ഇതിന് കരുത്ത് പകരുന്നത്. അഞ്ച് സ്പീഡ് ഗിയര്‍ബോക്‌സുമായി എന്‍ജിനെ ബന്ധിപ്പിച്ചിരിക്കുന്നു. 17 ഇഞ്ച് അലോയ് വീലുകളില്‍ ഡ്യുവല്‍-ചാനല്‍ എബിഎസ് ഉള്ള സിംഗിള്‍ ഡിസ്‌ക് ബ്രേക്ക് ആണ് ഇത് വാഗ്ദാനം ചെയ്യുന്നത്. ഇന്‍സ്ട്രുമെന്റേഷന്‍ സജ്ജീകരണത്തില്‍ എല്ലാ വിവരങ്ങളും ഉള്‍ക്കൊള്ളുന്ന നെഗറ്റീവ് LCD കണ്‍സോള്‍ ആണ് ക്രമീകരിച്ചിരിക്കുന്നത്. ടോപ്പ്-സ്‌പെക്ക് മോഡലിന് ബ്ലൂടൂത്ത് കണക്റ്റിവിറ്റിയും റൈഡ് മോഡുകളും ലഭിക്കുന്നു. ടാങ്കില്‍ യുഎസ്ബി ചാര്‍ജറും കാണാം.