ഇന്ത്യന്‍ കാര്‍ വിപണിയിലെ പ്രധാന ഫീച്ചറുകളിലൊന്നാണ് സണ്‍റൂഫ്. ചെറു കാറുകളില്‍പോലും സണ്‍റൂഫ് എന്ന ഫീച്ചര്‍ വന്നു കഴിഞ്ഞു. സണ്‍റൂഫ് ഇല്ലാത്ത മോഡലുകളില്‍ ചില കമ്പനികള്‍ ആഫ്റ്റര്‍ മാര്‍ക്കറ്റ് ഫിറ്റിങ്ങായി ഇവ ഘടിപ്പിച്ച് നല്‍കുന്നുണ്ട്. എന്നാല്‍ സണ്‍റൂഫുകള്‍ ശ്രദ്ധിച്ച് ഉപയോഗിച്ചില്ലെങ്കില്‍ ചോര്‍ച്ചയുണ്ടാകും.

സണ്‍റൂഫുള്ള പുതിയ വാഹനങ്ങളുടെ ഉടമകള്‍ റൂഫ് ചോര്‍ച്ചയെക്കുറിച്ച് പരാതിപ്പെട്ട പല സംഭവങ്ങളും ഉണ്ടായിട്ടുണ്ട്. ഇത്തരം തകരാറുകള്‍ക്ക് പല വിധമായ കാരണങ്ങളുണ്ട്. ഇത് ഒഴിവാക്കാന്‍ ചെയ്യേണ്ട കാര്യങ്ങള്‍ എന്തൊക്കെയെന്ന് നോക്കാം. സണ്‍റൂഫ് ഗ്ലാസിനെ ഉറപ്പിച്ചു നിര്‍ത്തുന്ന റബ്ബര്‍ സീലുകളിലൂടെ മഴവെള്ളം അരിച്ചിറങ്ങും. ഇങ്ങനെ എത്തുന്ന വെള്ളം കാറിനടിയിലേക്ക് വഴിതിരിച്ചുവിടുന്ന ഒരു ഡ്രെയിനേജ് സംവിധാനത്തിലൂടെയാണ് പുറത്തേക്ക് പോകുന്നത്.

എന്നാല്‍ റൂഫ് തുറന്നിരിക്കുമ്പോള്‍ ഇലകളോ മറ്റ് വസ്തുക്കളോ ഉള്ളില്‍ കുടുങ്ങിയാല്‍ സണ്‍റൂഫ് അസംബ്ലിക്ക് താഴെയുള്ള റബ്ബര്‍ ഡ്രെയിനേജ് പൈപ്പുകളിലേക്ക് നയിക്കുന്ന നേര്‍ത്ത ചാലുകള്‍ അടഞ്ഞുപോകാം. കാലക്രമേണ പൊടി അടിഞ്ഞുകൂടുന്നത് ഡ്രെയിനുകള്‍ അടയുന്നതിനും കാരണമാകും. പലപ്പോഴും റൂഫ് ചോര്‍ച്ചയ്ക്ക് ഇത് കാരണമാകും.

ഇതൊഴുവാക്കാന്‍ സണ്‍റൂഫിന്റെ ഡ്രെയിനേജ് സംവിധാനം വൃത്തിയാക്കാന്‍ വാക്വം ക്ലീനര്‍ ഉപയോഗിക്കുന്നത് മാത്രമാണ് സുരക്ഷിതമായ മാര്‍ഗം എന്നത് ശ്രദ്ധിക്കേണ്ട പ്രധാന കാര്യമാണ്. കാരണം ഇത് ദുര്‍ബലമായ റബ്ബര്‍ പൈപ്പുകള്‍ക്ക് കേടുപാടുകള്‍ സംഭവിക്കുന്നില്ലെന്ന് ഉറപ്പാക്കുന്നു.

ചാലുകള്‍ വൃത്തിയാക്കാന്‍ ഹാംഗറോ മറ്റ് വസ്തുക്കളോ ഉപയോഗിക്കുന്നതിലൂടെ റബ്ബര്‍ പൈപ്പുകള്‍ക്ക് കേടുപാടുകള്‍ സംഭവിക്കാനിടയുണ്ട്. അവ നന്നാക്കുന്നതിനും മാറ്റിവയ്ക്കുന്നതിനും ധാരാളം സമയവും അധ്വാനവും ആവശ്യമാണ്. കാരണം, ഡ്രെയിനേജ് ഭാഗത്തേക്ക് എത്താന്‍ വാഹനത്തിന്റെ എ-പില്ലറും ഫെന്‍ഡറും നീക്കം ചെയ്യേണ്ടിവരും.

സണ്‍റൂഫിലുണ്ടാകുന്ന തകരാര്‍ പരിഹരിക്കാന്‍ ഉടമകള്‍ക്ക് കൂടുതല്‍ തുക മുടക്കേണ്ടതായി വരും. അതുകൊണ്ടു തന്നെ കൂടുതല്‍ വില കൊടുത്ത് ഈ ഫീച്ചര്‍ വാങ്ങേണ്ടതുണ്ടോ എന്ന് ഉപഭോക്താക്കള്‍ ചിന്തിക്കേണ്ട കാര്യമാണ്.