മുംബൈ: പ്രമുഖ ഇരുചക്ര വാഹന നിര്‍മ്മാതാക്കളായ ടിവിഎസ് മോട്ടോര്‍ കമ്പനി തങ്ങളുടെ ആദ്യത്തെ അഡ്വഞ്ചര്‍ വാഹനമായ ആര്‍ടിഎക്‌സ് 300 ഇന്ന് ഇന്ത്യയില്‍ പുറത്തിറക്കും. പുത്തന്‍ പ്ലാറ്റ്ഫോമിനെ അടിസ്ഥാനമാക്കിയുള്ളതായിരിക്കും പുതിയ ബൈക്ക്. കെടിഎം 250 അഡ്വഞ്ചര്‍, റോയല്‍ എന്‍ഫീല്‍ഡ് സ്‌ക്രാം 440 എന്നിവയ്ക്കെതിരെ മത്സരം കടുപ്പിച്ചാണ് പുതിയ ബൈക്ക് വിപണിയില്‍ വരുന്നത്.

ഒറ്റ നോട്ടത്തില്‍ തന്നെ മനോഹരമായി തോന്നിപ്പിക്കുന്ന മോട്ടോര്‍സൈക്കിളില്‍ ഉയരമുള്ള വിന്‍ഡ്സ്‌ക്രീനും അതിന്റെ അടിയില്‍ ഒരു ചെറിയ കൊക്ക് പോലെ തോന്നിപ്പിക്കുന്ന പാനലും മിനുസമാര്‍ന്നതും വീതിയേറിയതുമായ ഹെഡ്ലാമ്പും കാണപ്പെടുന്നു. മസ്‌കുലര്‍ സൈഡ് പാനലുകളോട് ചേര്‍ന്ന് വലിയ ഇന്ധന ടാങ്ക് ആണ് ക്രമീകരിച്ചിരിക്കുന്നത്. സ്പ്ലിറ്റ്-ടൈപ്പ് സീറ്റിനൊപ്പം ഒരു പ്രത്യേക ലഗേജ് റാക്കും ഉണ്ട്.

പുതിയ 299 സിസി, ലിക്വിഡ്-കൂള്‍ഡ് ആര്‍ടിഎക്‌സ് ഡി 4 എന്‍ജിനാണ് ബൈക്കിന് കരുത്തുപകരുന്നത്. ഇത് 35 ബിഎച്ച്പിയും 28.5 എന്‍എം പീക്ക് ടോര്‍ക്കും പുറപ്പെടുവിക്കുന്നു. കൂടാതെ ആറ് സ്പീഡ് ഗിയര്‍ബോക്‌സുമായി ഇതിനെ ജോടിയാക്കിയിരിക്കുന്നു. യുഎസ്ഡി ഫോര്‍ക്കും മോണോഷോക്കും ഉപയോഗിച്ച് സസ്‌പെന്‍ഡ് ചെയ്ത ഒരു സ്റ്റീല്‍ ട്രെല്ലിസ് ഫ്രെയിമാണ് മറ്റൊരു പ്രത്യേകത.

19 ഇഞ്ച് ഫ്രണ്ട് വീലിലും 17 ഇഞ്ച് റിയര്‍ വീലിലുമാണ് ബൈക്ക് ഓടുന്നത്. രണ്ട് അറ്റത്തും ഡിസ്‌ക് ബ്രേക്ക് ബ്രേക്കിങ് കൈകാര്യം ചെയ്യും. കൂടാതെ, കളര്‍ ടിഎഫ്ടി ഡിസ്‌പ്ലേ, റൈഡ് മോഡുകള്‍, ട്രാക്ഷന്‍ കണ്‍ട്രോള്‍ തുടങ്ങിയ നിരവധി സവിശേഷതകള്‍ ടിവിഎസ് വാഗ്ദാനം ചെയ്യുമെന്ന് പ്രതീക്ഷിക്കുന്നു.