തൃശ്ശൂർ: ബാങ്കുകൾക്ക് എല്ലാ ശനിയാഴ്ചയും സമ്പൂർണ അവധി നൽകി ആഴ്ചയിൽ അഞ്ച് പ്രവൃത്തിദിനങ്ങളാക്കുന്നതിനെ അനുകൂലിച്ച് ജീവനക്കാരുടെ സംഘടനകൾ. നാല് ദേശീയ സംഘടനകൾ ഇക്കാര്യം നിർദേശിച്ച് ബാങ്ക് മാനേജ്‌മെന്റുകളുടെ കൂട്ടായ്മയായ ഇന്ത്യൻ ബാങ്ക് അസോസിയേഷന് കത്തുനൽകി. 

നിലവിൽ ആറര മണിക്കൂറാണ് ബാങ്കുകളുടെ പ്രവർത്തന സമയം. ഇത് ഏഴുമണിക്കൂറാക്കാം എന്നാണ് സംഘടനകളുടെ നിർദേശം. പ്രവർത്തനസമയം കൂട്ടാമെങ്കിലും പണമിടപാട് സമയം അഞ്ചരമണിക്കൂറായി നിലനിർത്തണം. ഓൾ ഇന്ത്യ ബാങ്ക് എംപ്ലോയീസ് അസോസിയേഷൻ, നാഷണൽ കോൺഫെഡറേഷൻ ഓഫ് ബാങ്ക് എംപ്ലോയീസ്, നാഷണൽ ഓർഗനൈസേഷൻ ഓഫ് ബാങ്ക് വർക്കേഴ്‌സ്, ഇന്ത്യൻ നാഷണൽ ബാങ്ക് എംപ്ലോയീസ് ഫെഡറേഷൻ എന്നിവയാണ് കത്ത് നൽകിയത്. 

നിലവിൽ രണ്ടാം ശനിയും നാലാം ശനിയും ഇപ്പോൾ ബാങ്ക് അവധിയാണ്. സംഘടനകൾ ഉന്നയിച്ച ഇപ്പോഴത്തെ ആവശ്യം അം​ഗീകരിച്ചാൽ മാസത്തിലെ ഒന്നാം ശനിയാഴ്ചയും മൂന്നാം ശനിയാഴ്ചയും ബാങ്ക് അവധിയായിരിക്കും.  രാജ്യത്തുടനീളം ഒരേ പ്രവർത്തനസമയമാക്കണമെന്ന നിർദേശം ഇന്ത്യൻ ബാങ്ക് അസോസിയേഷൻ മുന്നോട്ടുവെച്ചിരുന്നു. എന്നാൽ ഇത് അംഗീകരിക്കാനാവില്ലെന്ന് ജീവനക്കാരുടെ സംഘടനകൾ വ്യക്തമാക്കി.

ഈ വാർത്ത കൂടി വായിക്കൂ 

നിങ്ങള്‍ ക്രെഡിറ്റ് കാര്‍ഡ് ഉപയോഗിക്കുന്നവരാണോ?;  പ്രശ്‌നങ്ങളില്‍ വീഴാതിരിക്കാന്‍ ഇക്കാര്യങ്ങള്‍ ശ്രദ്ധിക്കുക!

സമകാലിക മലയാളം ഇപ്പോൾ വാട്ട്‌സ്ആപ്പിലും ലഭ്യമാണ്. ഏറ്റവും പുതിയ വാർത്തകൾ അറിയാൻ ക്ലിക്ക് ചെയ്യൂ