ന്യൂഡല്‍ഹി: 2000 രൂപയില്‍ കൂടുതലുള്ള യുപിഐ ഇടപാടുകള്‍ക്ക് ജിഎസ്ടി ചുമത്താന്‍ സര്‍ക്കാര്‍ പദ്ധതിയിടുന്നില്ലെന്ന് ധനമന്ത്രാലയം. രാജ്യസഭയില്‍ ജിഎസ്ടിയുമായി ബന്ധപ്പെട്ട ചോദ്യത്തിന് മറുപടി നല്‍കുകയായിരുന്നു കേന്ദ്രം.

'2000 രൂപയില്‍ കൂടുതലുള്ള യുപിഐ ഇടപാടുകള്‍ക്ക് ജിഎസ്ടി ചുമത്താന്‍ ജിഎസ്ടി കൗണ്‍സില്‍ ശുപാര്‍ശ ചെയ്തിട്ടില്ല,'- 2000 രൂപയില്‍ കൂടുതലുള്ള യുപിഐ ഇടപാടുകള്‍ക്ക് ജിഎസ്ടി ചുമത്താനുള്ള നിര്‍ദ്ദേശം സര്‍ക്കാര്‍ പരിഗണിക്കുന്നുണ്ടോ എന്ന ചോദ്യത്തിന് മറുപടിയായി ധനകാര്യ സഹമന്ത്രി പങ്കജ് ചൗധരി പറഞ്ഞു. മണ്‍സൂണ്‍ സമ്മേളനത്തിനിടെയാണ് മന്ത്രിയുടെ മറുപടി.

ജിഎസ്ടി കൗണ്‍സിലിന്റെ ശുപാര്‍ശകളുടെ അടിസ്ഥാനത്തിലാണ് ജിഎസ്ടി നിരക്കുകളും ഇളവുകളും തീരുമാനിക്കുന്നതെന്നും മന്ത്രി സഭയെ അറിയിച്ചു. യുപിഐ ഇടപാടുകളുമായി ബന്ധപ്പെട്ട് കര്‍ണാടകയിലെ വ്യാപാരികള്‍ക്ക് ഏകദേശം 6,000 ജിഎസ്ടി ഡിമാന്‍ഡ് നോട്ടീസുകള്‍ ലഭിച്ചതിനെ തുടര്‍ന്നാണ് ചോദ്യം ഉയര്‍ന്നത്.