മുംബൈ: ഓഹരി വിപണിയില്‍ പത്തുമുന്‍നിര കമ്പനികളില്‍ എട്ടെണ്ണത്തിന്റെ വിപണി മൂല്യത്തില്‍ വര്‍ധന. വെള്ളിയാഴ്ച അവസാനിച്ച ആഴ്ചയില്‍ ഈ കമ്പനികളുടെ വിപണി മൂല്യത്തില്‍ ഒന്നടങ്കം 4.13 ലക്ഷം കോടിയുടെ വര്‍ധനയാണ് രേഖപ്പെടുത്തിയത്. എച്ച്ഡിഎഫ്‌സി ബാങ്കും ഐസിഐസിഐ ബാങ്കുമാണ് ഏറ്റവുമധികം നേട്ടം സ്വന്തമാക്കിയത്.

കഴിഞ്ഞയാഴ്ച ബിഎസ്ഇ സെന്‍സെക്‌സ് 4230 പോയിന്റ് ആണ് മുന്നേറിയത്. നിഫ്റ്റിയില്‍ 1337 പോയിന്റിന്റെ നേട്ടമാണ് രേഖപ്പെടുത്തിയത്. പശ്ചിമേഷ്യന്‍ സംഘര്‍ഷത്തിന് അയവ് വരുമെന്ന പ്രതീക്ഷയാണ് വിപണിയില്‍ പ്രതിഫലിച്ചത്. ഇതിന്റെ തുടര്‍ച്ചയായി എണ്ണവിലയില്‍ ഉണ്ടായ ഇടിവ് വിപണിക്ക് കരുത്തുപകര്‍ന്നു.

വിപണി മൂല്യത്തില്‍ എച്ച്ഡിഎഫ്‌സി ബാങ്ക് ആണ് ഏറ്റവുമധികം നേട്ടം സ്വന്തമാക്കിയത്. 91,282 കോടിയുടെ നേട്ടമാണ് എച്ച്ഡിഎഫ്‌സി ബാങ്ക് സ്വന്തമാക്കിയത്. 12,47,478 കോടിയായാണ് എച്ച്ഡിഎഫ്‌സി ബാങ്കിന്റെ വിപണി മൂല്യം ഉയര്‍ന്നത്.

ഐസിഐസിഐ ബാങ്ക് 76,036 കോടി, ബജാജ് ഫിനാന്‍സ് 60,980 കോടി, എല്‍ ആന്റ് ടി 47,624 കോടി, ഭാരതി എയര്‍ടെല്‍ 45,873 കോടി എന്നിങ്ങനെയാണ് മറ്റു കമ്പനികളുടെ വിപണി മൂല്യത്തില്‍ ഉണ്ടായ വര്‍ധന. അതേസമയം ഇന്‍ഫോസിസിന്റെയും വിപണി മൂല്യത്തില്‍ 3,285 കോടിയുടെ കുറവ് രേഖപ്പെടുത്തി. റിലയന്‍സിന് വിപണി മൂല്യത്തില്‍ 947 കോടിയുടെ നഷ്ടമാണ് ഉണ്ടായത്. എങ്കിലും വിപണി മൂല്യത്തില്‍ റിലയന്‍സ് തന്നെയാണ് മുന്നിട്ടുനില്‍ക്കുന്നത്.