ഗ്യാനേഷ് കുമാറിനെതിരെ ജനകീയ കുറ്റവിചാരണ, പരീക്ഷയില്‍ ബോധപൂര്‍വം അട്ടിമറി, E100 ഇന്ധനത്തിന് എഥനോള്‍ എവിടുന്ന്? ; ഇന്നത്തെ 5 പ്രധാന വാര്‍ത്തകള്‍

മുഖ്യതെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിനെതിരെ ഇന്ത്യ സഖ്യത്തിന്റെ ജനകീയ കുറ്റവിചാരണ ഇന്ന് നടത്തും.E-100 ഇന്ധനത്തിന് എഥനോൾ എവിടുന്ന് ലഭിക്കുമെന്ന് കേന്ദ്രത്തോട് സുപ്രീംകോടതി. പിഎസ് സി ആസൂത്രണബോർഡ് പരീക്ഷയിൽ അട്ടിമറി നടന്നുവെന്ന് റിമാൻഡ് റിപ്പോർട്ട്. ഇന്ത്യ- ന്യൂസിലൻഡ് നാലാം മത്സരം ഇന്ന് നടക്കും. ആരാധകരോട് നന്ദി പറഞ്ഞ് റൊണാൾഡോ. ഇന്നത്തെ 5 പ്രധാന വാർത്തകൾ ( Top 5 News Today ) അറിയാം.

വോട്ടു ക്രമക്കേട് ആരോപണത്തിന്റെ പശ്ചാത്തലത്തില്‍ മുഖ്യ തെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിനെതിരെ 'ഇന്ത്യ'സഖ്യത്തിന്റെ 'ജനകീയ കുറ്റവിചാരണ' ( 'ജൻ മഹാഭിയോഗ്' ) ഇന്ന് നടക്കും. കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെയുടെ 10 രാജാജി മാര്‍ഗിലെ വസതിയില്‍ വൈകീട്ട് 3.30-ന് 'പബ്ലിക് ഇംപീച്ച്‌മെന്റ്' തുടങ്ങും. നവംബര്‍ ഒന്നിന് രാംലീല മൈതാനിയില്‍ നടക്കുന്ന 'ഡല്‍ഹി ചലോ' മഹാറാലിയുടെ തുടക്കമായാണ് പ്രതിഷേധസമരം.

നൂറുശതമാനവും എഥനോളില്‍ പ്രവര്‍ത്തിക്കുന്ന വാഹനങ്ങള്‍ക്ക് അനുമതി നല്‍കിക്കൊണ്ടുള്ള പുതിയ ഉത്തരവിനു പിന്നാലെ, രാജ്യത്ത് ഇതിനാവശ്യമായ ഇന്ധന ലഭ്യത എങ്ങനെ ഉറപ്പാക്കുമെന്ന് കേന്ദ്ര സര്‍ക്കാരിനോട് സുപ്രീംകോടതി. 'നൂറുശതമാനം എഥനോളില്‍ ഓടുന്ന വാഹനങ്ങള്‍ക്ക് അനുമതി നല്‍കിയിട്ടുണ്ടെങ്കില്‍, അത്രയും വലിയ അളവില്‍ ഇന്ധന ലഭ്യത എങ്ങനെ ഉറപ്പാക്കുമെന്നാണ് ഞങ്ങള്‍ അറിയാന്‍ ആഗ്രഹിക്കുന്നത് -കോടതി വ്യക്തമാക്കി.

പിഎസ് സി നടത്തിയ ആസൂത്രണ ബോര്‍ഡ് പരീക്ഷയില്‍ ബോധപൂര്‍വമായ അട്ടിമറി നടന്നെന്ന് റിമാന്‍ഡ് റിപ്പോര്‍ട്ട്. അറസ്റ്റിലായ മുന്‍ ഡെപ്യൂട്ടി സെക്രട്ടറി പി സതീഷിന്റെ റിമാന്‍ഡ് റിപ്പോര്‍ട്ടിലാണ് ക്രൈംബ്രാഞ്ച് ഇക്കാര്യം പറയുന്നത്. ബോധപൂര്‍വം ചോദ്യങ്ങള്‍ ഒഴിവാക്കിയാണ് മൂല്യനിര്‍ണയത്തിന് നല്‍കിയത്. മൂല്യനിര്‍ണയത്തിന് ശേഷം ഒഴിവാക്കിയവ നിലനിര്‍ത്തി ഓണ്‍ലൈന്‍ ക്യാമ്പ് ക്ലോസ് ചെയ്തുവെന്നും റിമാന്‍ഡ് റിപ്പോര്‍ട്ടില്‍ പറയുന്നു.

ഫുട്ബോൾ ലോകത്തെ ഏറ്റവും മികച്ച പ്രകടനത്തെ ആദരിക്കുന്നതിനായി ആദ്യമായി ഏർപ്പെടുത്തിയ 'ഓൾ ടൈം ബാല്ലൺ ഡി ഓർ' (BOAT) പുരസ്കാരം സ്വന്തമാക്കിയതിനു പിന്നാലെ ലോകമെമ്പാടുമുള്ള ആരാധകർക്ക് നന്ദി പറഞ്ഞ് ഇതിഹാസ താരവും പോർച്ചു​ഗൽ നായകനുമായ ക്രിസ്റ്റ്യാനോ റൊണാൾഡോ. കളത്തിലെ ചിരവൈരിയായ അർജന്റീന ഇതിഹാസം ലയണൽ മെസിയെ പിന്തള്ളിയാണ് റൊണാൾഡോ നേട്ടത്തിലെത്തിയത്. ഇതാദ്യമായും അവസാനമായുമാണ് ഇത്തരമൊരു പുരസ്കാരം നൽകുന്നതെന്നു സംഘാടകർ നേരത്തെ വ്യക്തമാക്കിയിരുന്നു.

പ്രണയബന്ധത്തിലെ അകൽച്ച മാറി പരസ്പര അടുപ്പം വർധിക്കും. ജോലിസ്ഥലത്ത് നിങ്ങളുടെ കഴിവുകൾ അംഗീകരിക്കപ്പെടും. മുടങ്ങിക്കിടന്ന പണമിടപാടിൽ പുരോഗതിയുണ്ടാകും. മക്കളുടെ പഠനത്തിലോ തൊഴിൽകാര്യത്തിലോ പ്രതീക്ഷ നൽകുന്ന വിവരം ലഭിക്കും. പുതിയ ജോലി തേടുന്നവർക്ക് അനുകൂലമായ അവസരം ലഭിക്കും . ഭക്ഷണക്രമത്തിൽ ശ്രദ്ധ പുലർത്തണം.