ചാഞ്ചാടി നില്‍ക്കുകയാണ് ഓഹരി വിപണി. എന്ന് ശക്തമായി തിരിച്ചുവരുമെന്ന കാര്യത്തില്‍ വ്യക്തതയില്ല. നിലവിലെ സാഹചര്യത്തില്‍ ദീര്‍ഘകാലം ലക്ഷ്യമിട്ട് എസ്‌ഐപി വഴി മ്യൂച്ചല്‍ ഫണ്ടില്‍ നിക്ഷേപിക്കുന്നതില്‍ തെറ്റില്ലെന്നാണ് ഒരു വിഭാഗം വിപണി വിദഗ്ധര്‍ പറയുന്നത്. നിക്ഷേപകരെ വ്യത്യസ്ത സമയങ്ങളില്‍ നിക്ഷേപിക്കാന്‍ അനുവദിക്കുന്നതിനാല്‍ വിപണിയിലെ ചാഞ്ചാട്ടം കൈകാര്യം ചെയ്യുന്നതില്‍ എസ്‌ഐപികള്‍ മുന്നിട്ടുനില്‍ക്കുന്നു. അതുവഴി റിസ്‌ക് വൈവിധ്യവല്‍ക്കരണത്തിനുള്ള സാധ്യതയുമുണ്ട്. അസ്ഥിരമായ മാര്‍ക്കറ്റ് ഘട്ടങ്ങളില്‍ ഈ സമീപനം നല്ലതാണെന്നാണ് വിപണി വിദഗ്ധരുടെ അഭിപ്രായം.

അസ്ഥിരത നിലനില്‍ക്കുന്ന സമയങ്ങളില്‍ നിക്ഷേപകര്‍ അവരുടെ എസ്‌ഐപി തുക ഉയര്‍ത്തുന്നതും ഭാവിയില്‍ ഗുണം ചെയ്യുമെന്നും ഒരു വിഭാഗം വിപണി വിദഗ്ധര്‍ വാദിക്കുന്നുണ്ട്. കയറ്റിറക്കങ്ങളില്‍ ആവറേജ് ചെയ്യുന്നത് കൊണ്ട് വലിയ റിസ്‌ക് വരുന്നില്ലെന്നാണ് വിദഗ്ധര്‍ പറയുന്നത്. അച്ചടക്കം പാലിക്കാനും വിപണിയിലെ ഉയര്‍ച്ച താഴ്ചകളില്‍ ആവേശകരമായ എക്‌സിറ്റുകള്‍ തടയാനും എസ്‌ഐപികള്‍ സഹായിക്കുന്നുണ്ട്. എസ്ഐപി നിക്ഷേപം ഗ്യാരണ്ടീഡ് റിട്ടേണ്‍ സ്‌കീം അല്ല എന്ന കാര്യവും ഓര്‍ക്കേണ്ടതാണ്. നഷ്ടസാധ്യത ഉള്ള കാര്യവും നിക്ഷേപകര്‍ ഓര്‍ക്കണമെന്നും വിപണി വിദഗ്ധര്‍ പറഞ്ഞു. വിപണിയുടെ ഏറ്റക്കുറച്ചിലുകളും എസ്ഐപി നിക്ഷേപത്തെ സ്വാധീനിക്കും.

പ്രതിമാസം 2,000 രൂപയുടെ എസ്ഐപി വഴി ഒരു കോടി രൂപയുടെ സമ്പാദ്യം ഉണ്ടാക്കാന്‍ എത്ര സമയമെടുക്കും?

പ്രതിവര്‍ഷം 10 ശതമാനം റിട്ടേണ്‍ ലഭിക്കുമെന്ന് കരുതുക. ലക്ഷ്യത്തിലെത്താന്‍ ഏകദേശം 38 വര്‍ഷമെടുക്കും. പ്രതിവര്‍ഷം 12 ശതമാനം റിട്ടേണ്‍ ലഭിക്കുകയാണെങ്കില്‍ സമയപരിധി ഏകദേശം 33 വര്‍ഷമായി കുറയും. എന്നാല്‍ 15 ശതമാനം വാര്‍ഷിക ലാഭം ലഭിക്കുകയാണെങ്കില്‍ ഏകദേശം 28 വര്‍ഷത്തിനുള്ളില്‍ ഈ നേട്ടം കൈവരിക്കാനാകും. ഇവ വെറുമൊരു ഏകദേശ കണക്കുകള്‍ മാത്രമാണ്. വിപണിയുടെ പ്രകടനത്തിനനുസരിച്ച് യഥാര്‍ത്ഥ ലാഭത്തില്‍ മാറ്റങ്ങള്‍ വരാം. വര്‍ഷംതോറും എസ്‌ഐപി തുക പത്തുശതമാനം വീതം വര്‍ധിപ്പിക്കുകയാണെങ്കില്‍ ഒരുപാട് വര്‍ഷങ്ങള്‍ പാഴാക്കാതെ തന്നെ ഒരു കോടി നേട്ടം കൈവരിക്കാന്‍ സാധിക്കും.

കൂട്ടുപലിശയുടെ ശക്തിയാണ് എസ്ഐപി നിക്ഷേപങ്ങളുടെ ഏറ്റവും വലിയ നേട്ടം. ആദ്യ വര്‍ഷങ്ങളില്‍ സമ്പാദ്യം വളരുന്നത് പ്രധാനമായും ഓരോ മാസവും അടയ്ക്കുന്ന തുകയിലൂടെയാണ്. എന്നാല്‍ സമയം കടന്നുപോകുമ്പോള്‍, ലാഭത്തില്‍ നിന്ന് വീണ്ടും ലാഭം ഉണ്ടായിത്തുടങ്ങുകയും ഇത് നിക്ഷേപത്തിന്റെ വളര്‍ച്ചയെ വേഗത്തിലാക്കുകയും ചെയ്യും. അതുകൊണ്ടാണ് വിപണിയിലെ ശരിയായ സമയം പ്രവചിക്കുന്നതിനേക്കാള്‍ പ്രധാനം വിപണിയില്‍ ദീര്‍ഘകാലം തുടരുന്നതാണെന്ന് വിദഗ്ധര്‍ ആവര്‍ത്തിച്ച് പറയുന്നത്.