മുംബൈ: ഡോളറിനെതിരെ ശക്തമായി തിരിച്ചുകയറി രൂപ. വ്യാപാരത്തിന്റെ തുടക്കത്തില്‍ 119 പൈസയാണ് തിരിച്ചുകയറിയത്. ഇതോടെ ഒരു ഡോളറിന്റെ മൂല്യം 90.30 രൂപയായി.

അമേരിക്ക ഇറക്കുമതി തീരുവ കുറച്ചതാണ് രൂപയ്ക്ക് കരുത്തായത്. ഇന്ത്യയില്‍ നിന്ന് ഇറക്കുമതി ചെയ്യുന്ന ഉല്‍പ്പന്നങ്ങളുടെ തീരുവ 50 ശതമാനത്തില്‍ നിന്ന് 18 ശതമാനമായാണ് കുറച്ചത്. വിദേശനിക്ഷേപ സ്ഥാപനങ്ങള്‍ വീണ്ടും കൂടുതലായി നിക്ഷേപം നടത്താന്‍ ഇത് സഹായകമാകുമെന്നാണ് വിപണി വിദഗ്ധരുടെ വിലയിരുത്തല്‍. ഇന്നലെ 91.49 എന്ന നിലയിലാണ് രൂപയുടെ വിനിമയം അവസാനിച്ചത്. 9 മാസം നീണ്ട അനിശ്ചിതത്വങ്ങള്‍ക്ക് ഒടുവിലാണ് ഇന്ത്യ- അമേരിക്ക വ്യാപാര കരാര്‍ യാഥാര്‍ഥ്യമായി എന്ന തരത്തില്‍ അമേരിക്കന്‍ പ്രസിഡന്റ് ഡോണള്‍ഡ് ട്രംപ് പ്രഖ്യാപനം നടത്തിയത്.

ഡോളര്‍ ദുര്‍ബലമായതും രൂപയ്ക്ക് തുണയായി. ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡിന്റെ വില ബാരലിന് 66.03 ഡോളറായി താഴ്ന്നതും രൂപയുടെ മൂല്യത്തില്‍ പ്രതിഫലിച്ചു.