മുംബൈ: ഓഹരി വിപണിയില്‍ ഇന്നും ഇടിവ്. വ്യാപാരത്തിന്റെ തുടക്കത്തില്‍ ബിഎസ്ഇ സെന്‍സെക്‌സ് 350 പോയിന്റ് ആണ് താഴ്ന്നത്. നിഫ്റ്റി 24,400ല്‍ താഴെയെത്തി. എണ്ണവില ഉയര്‍ന്നത് അടക്കമുള്ള ഘടകങ്ങളാണ് ഓഹരി വിപണിയില്‍ പ്രതിഫലിച്ചത്.

ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡ് വില വീണ്ടും ബാരലിന് 90 ഡോളറിലേക്ക് അടുക്കുകയാണ്. അമേരിക്ക- ഇറാന്‍ സംഘര്‍ഷം തുടരുന്നത് അടക്കമുള്ള ഘടകങ്ങളാണ് എണ്ണവിലയില്‍ പ്രതിഫലിക്കുന്നത്. ഇതിന് പുറമേ വരാനിരിക്കുന്ന അമേരിക്കന്‍ വിലക്കയറ്റ കണക്കുകളും നിക്ഷേപകര്‍ സൂക്ഷ്മമായാണ് നിരീക്ഷിക്കുന്നത്. ഇത് യുഎസ് കേന്ദ്രബാങ്കിന്റെ നയങ്ങളെ സ്വാധീനിക്കുമെന്നതിനാലാണ് നിക്ഷേപകര്‍ ഇതിന് ഏറെ ഗൗരവം നല്‍കുന്നത്. എച്ച്ഡിഎഫ്‌സി ബാങ്ക്, ഭാരതി എയര്‍ടെല്‍ ഓഹരികളാണ് പ്രധാനമായി നഷ്ടം നേരിടുന്നത്. അതേസമയം ഹിന്‍ഡാല്‍കോ, ഗ്രാസിം, എസ്ബിഐ, ട്രെന്റ് ഓഹരികള്‍ നേട്ടം സ്വന്തമാക്കുന്നുണ്ട്.

അതിനിടെ ഡോളറിനെതിരെ രൂപയുടെ മൂല്യവും ഇടിഞ്ഞു. ആറു പൈസയുടെ ഇടിവോടെ 95.42ലേക്കാണ് രൂപയുടെ മൂല്യം താഴ്ന്നത്. എണ്ണവിലയുടെ കുതിപ്പ് അടക്കമുള്ള വിഷയങ്ങളാണ് രൂപയെ സ്വാധീനിക്കുന്നത്. ഇന്നലെയും നഷ്ടത്തിലാണ് രൂപ ക്ലോസ് ചെയ്തത്.