മുംബൈ: ഓഹരി വിപണിയില്‍ തുടര്‍ച്ചയായ രണ്ടാം ദിവസവും മുന്നേറ്റം. സെന്‍സെക്‌സില്‍ 74,900ന് മുകളിലാണ് വ്യാപാരം തുടരുന്നത്. നിഫ്റ്റി 23,450ന് മുകളിലാണ്.

ആഗോള വിപണിയിലെ മുന്നേറ്റമാണ് ഇന്ത്യന്‍ വിപണിയില്‍ പ്രതിഫലിക്കുന്നത്. കൂടാതെ എണ്ണവിലയില്‍ അയവുവന്നത് വിപണിയെ സ്വാധീനിക്കുന്നുണ്ട്. പശ്ചിമേഷ്യന്‍ സംഘര്‍ഷത്തിന് അയവ് വരുത്തി അമേരിക്കയും ഇറാനും തമ്മില്‍ വീണ്ടും ധാരണയില്‍ എത്തുമെന്ന പ്രതീക്ഷയാണ് എണ്ണവില കുറയാന്‍ കാരണം. എങ്കിലും എണ്ണവില കാര്യമായി കുറഞ്ഞു എന്ന് പറയാന്‍ സാധിക്കില്ല. ഇപ്പോഴും 101 ഡോളറിന് മുകളിലാണ് എണ്ണവില.

പ്രധാനമായി എച്ച്ഡിഎഫ്‌സി ബാങ്ക്, അദാനി പോര്‍ട്‌സ്, ഇന്റര്‍ഗ്ലോബ് ഏവിയേഷന്‍, മാരുതി, ഏഷ്യന്‍ പെയിന്റ്‌സ് ഓഹരികളാണ് നേട്ടം ഉണ്ടാക്കുന്നത്. എച്ച്‌സിഎല്‍ ടെക്, ഇന്‍ഫോസിസ്, ടെക് മഹീന്ദ്ര, ടിസിഎസ്, സണ്‍ ഫാര്‍മ ഓഹരികള്‍ നഷ്ടത്തിലാണ്. അതിനിടെ ഡോളറിനെതിരെ രൂപയുടെ മൂല്യം ഉയര്‍ന്നു. 13 പൈസയുടെ നേട്ടത്തോടെ 95.65ലേക്കാണ് രൂപയുടെ മൂല്യം ഉയര്‍ന്നത്. എണ്ണവില കുറഞ്ഞതും ഓഹരി വിപണിയിലെ മുന്നേറ്റവുമാണ് രൂപയുടെ മൂല്യത്തില്‍ പ്രതിഫലിച്ചത്. ഇന്നലെ രൂപ 18 പൈസയുടെ നേട്ടമാണ് സ്വന്തമാക്കിയത്.