കേരള കർഷകത്തൊഴിലാളി ക്ഷേമനിധി ബോർഡിലെ അം​ഗങ്ങളുടെ മക്കൾക്കുള്ള കഴിഞ്ഞ അധ്യയന വർഷത്തെ വിദ്യാഭ്യാസ ധനസഹായത്തിന് ഇപ്പോൾ അപേക്ഷ നൽകണം. പ്രീ-മെട്രിക് സ്കോളർഷിപ്പിന് അർഹരായ വിദ്യാർത്ഥികൾ ഈ വർഷത്തെ സ്കോളർഷിപ്പിന് അപേക്ഷിക്കേണ്ടതും ഈ മാസമാണ്.

പ്രീ-മെട്രിക് സ്കോളർഷിപ്പ്

പട്ടികജാതി വിഭാ​ഗത്തിൽപ്പെട്ട സ്കൂൾ വിദ്യാർത്ഥികൾക്കുള്ള സെൻട്രൽ പ്രീ-മെട്രിക് സ്കോള‍ർഷിപ്പിന് അപേക്ഷ ക്ഷണിച്ചു. 9-10 ക്ലാസുകളിൽ പഠിക്കുന്ന വിദ്യാർഥികൾക്കുള്ള 2025-26 വർഷത്തെ സെൻട്രൽ പ്രീ-മെട്രിക് സ്കോളർഷിപ്പ് പദ്ധതിക്കാണ് അപേക്ഷ ക്ഷണിച്ചിട്ടുള്ളത്. സർക്കാർ/ എയ്ഡഡ് സർക്കാർ അംഗീകൃത അൺ എയ്ഡഡ് സ്കൂളുകളിൽ പഠിക്കുന്നവർക്ക് അപേക്ഷിക്കാം.

കുടുംബ വാർഷിക വരുമാന പരിധി 2.50 ലക്ഷം രൂപവരെയുള്ള വിദ്യാർഥികൾക്ക് അപേക്ഷിക്കാനുള്ള അർഹത. അപേക്ഷകൾ സ്കൂളിൽനിന്നും ഇ-ഗ്രാന്റ്സ് പോർട്ടൽ മുഖേന ഓൺലൈനായി നൽകണം. അവസാന തീയതി ഓഗസ്റ്റ് 31.

കൂടുതൽവിവരങ്ങൾ അതത് ബ്ലോക്ക്/ മുൻസിപ്പാലിറ്റി/ കോർപ്പറേഷൻ പട്ടികജാതി വികസന ഓഫീസുകളിൽ നിന്നും ലഭിക്കും

വിദ്യാഭ്യാസ ധനസഹായം

കേരള കർഷക തൊഴിലാളി ക്ഷേമനിധി ബോർഡിൽ അംഗങ്ങളായിട്ടുള്ള കർഷക തൊഴിലാളികളുടെ മക്കൾക്ക് 2024-25 അധ്യയന വർഷത്തെ വിദ്യാഭ്യാസ ധനസഹായം നൽകുന്നു.

സർക്കാർ / എയ്ഡഡ് സ്കൂളിൽ കേരള സ്റ്റേറ്റ് സിലബസിൽ വിദ്യാഭ്യാസം നടത്തിയവരും പരീക്ഷ ആദ്യ അവസരത്തിൽ പാസായവരുമായ വിദ്യാർഥികൾ ആയിരിക്കണം. 2024-25 വർഷത്തെ എസ് എസ് എൽ സി / ടി എച്ച് എസ് എൽ സി പരീക്ഷയിൽ 75 ഉം അതിൽ കൂടുതൽ പോയിന്റും നേടിയവരായിരിക്കണം. എസ് സി / എസ് ടി വിഭാഗത്തിൽപ്പെട്ടവർക്ക് 70 പോയിന്റ് ലഭിച്ചിരിക്കണം.

ഹയർസെക്കൻഡറി / വി എച്ച് എസ് സി അവസാന വർഷ പരീക്ഷയിൽ 85 ശതമാനത്തിൽ കുറയാതെ മാർക്ക് ലഭിച്ചിരിക്കണം. എസ് സി / എസ് ടി വിഭാഗത്തിൽപ്പെട്ടവർക്ക് 80 ശതമാനത്തിൽകുറയാതെമാ‍ർക്ക് നേടിയിരിക്കണം.

വിദ്യാർഥികൾക്ക് ഓ​ഗസ്റ്റ് 30 വരെ ജില്ലാ ഓഫീസുകളിൽ അപേക്ഷിക്കാം. അപ്പീൽ അപേക്ഷകൾ സെപ്തംബർ 15 വരെ തൃശൂർ ചീഫ് എക്സിക്യൂട്ടീവ് ഓഫീസിൽ സ്വീകരിക്കും. അപേക്ഷാ ഫോം www.agriworkersfund.org യിൽ ലഭ്യമാണ്. കൂടുതൽ വിവരങ്ങൾക്ക്: 0471 2729175.