ആരോഗ്യകരമായ ജീവിതത്തിന് കൃത്യമായ വ്യായാമവും മതിയായ ഉറക്കവും പോലെ തന്നെ പ്രധാനമാണ് പോഷകസമൃദ്ധമായ ഭക്ഷണവും. എന്നാൽ തിരക്കിനിടെ ഭക്ഷണത്തിന്റെ കാര്യത്തിൽ പലപ്പോഴും വേണ്ടത്ര ശ്രദ്ധ നൽകാൻ കഴിയാതെ വരാറുണ്ടോ? വിശക്കുമ്പോൾ പെട്ടെന്ന് കഴിക്കാനായി ബിസ്ക്കറ്റുകൾ, ചിപ്സ്, ബേക്കറി പലഹാരങ്ങളാണ് അടുക്കളയിൽ മിക്കവാറും കരുതുക. എന്നാൽ ഇനി ഇത്തരം ശീലങ്ങൾ ഒഴിവാക്കി അടുക്കളയിൽ ചില ആരോഗ്യകരമായ ഭക്ഷണങ്ങൾ കരുതിവയ്ക്കാം.
ബദാം, വാൾനട്ട്, കശുവണ്ടി, മത്തങ്ങാവിത്തുകൾ, സൂര്യകാന്തിവിത്തുകൾ തുടങ്ങിയവ പോഷകങ്ങളുടെ കലവറയാണ്. ആരോഗ്യകരമായ കൊഴുപ്പ്, പ്രോട്ടീൻ, ഫൈബർ, വിറ്റാമിനുകൾ, ധാതുക്കൾ എന്നിവ ഇവയിൽ അടങ്ങിയിട്ടുണ്ട്. ഇടനേരങ്ങളിൽ വിശക്കുമ്പോൾ എണ്ണയിൽ വറുത്ത പലഹാരങ്ങൾക്ക് പകരം ഇവ കഴിക്കാവുന്നതാണ്. ദിവസവും ചെറിയൊരു അളവിൽ നട്സും വിത്തുകളും ഭക്ഷണത്തിൽ ഉൾപ്പെടുത്തുന്നത് ഹൃദയാരോഗ്യത്തിനും മൊത്തത്തിലുള്ള ആരോഗ്യത്തിനും ഗുണകരമാണ്. ഉപ്പും പഞ്ചസാരയും ചേർക്കാത്തവ തിരഞ്ഞെടുക്കാൻ ശ്രദ്ധിക്കുക.
പ്രഭാതഭക്ഷണത്തിന് എളുപ്പത്തിൽ തയ്യാറാക്കാവുന്ന ആരോഗ്യകരമായ ഭക്ഷണമാണ് ഓട്സ്. ഇതിൽ ലയിക്കുന്ന ഫൈബറായ ബീറ്റാ ഗ്ലൂക്കാൻ അടങ്ങിയിട്ടുണ്ട്. ഇത് കൊളസ്ട്രോൾ നിയന്ത്രിക്കാനും രക്തത്തിലെ പഞ്ചസാരയുടെ അളവ് നിയന്ത്രിക്കാൻ സഹായിക്കും. പാൽ, പഴങ്ങൾ, നട്സ്, വിത്തുകൾ എന്നിവ ചേർത്ത് ഓട്സ് കഴിക്കാം. പഞ്ചസാര ചേർത്ത ഫ്ലേവേർഡ് ഓട്സിന് പകരം സാധാരണ ഓട്സ് തിരഞ്ഞെടുക്കുന്നതാണ് നല്ലത്.
ചെറുപയർ, കടല, വൻപയർ, പരിപ്പ് തുടങ്ങിയ പയറുവർഗങ്ങൾ അടുക്കളയിൽ എപ്പോഴും കരുതാവുന്ന ഭക്ഷണങ്ങളാണ്. സസ്യപ്രോട്ടീൻ്റെയും ഫൈബറിൻ്റെയും മികച്ച ഉറവിടങ്ങളാണിവ. ദീർഘനേരം വയറുനിറഞ്ഞ സംതൃപ്തി നൽകാനും സഹായിക്കും. കറികളായും സാലഡുകളായും മുളപ്പിച്ചും ഇവ ഭക്ഷണത്തിൽ ഉൾപ്പെടുത്താം.
ചിയ വിത്തുകളിലും ഫ്ലാക്സ് സീഡിലും ഫൈബർ, സസ്യാധിഷ്ഠിത ഒമേഗ 3 ഫാറ്റി ആസിഡുകൾ എന്നിവ അടങ്ങിയിട്ടുണ്ട്. ദഹനാരോഗ്യത്തിനും ഹൃദയാരോഗ്യത്തിനും ഇവ സഹായകമാണ്. ചിയ വിത്തുകൾ വെള്ളത്തിലോ പാലിലോ കുതിർത്ത് കഴിക്കാം. ഫ്ലാക്സ് സീഡ് പൊടിച്ച് ഓട്സ്, തൈര്, സ്മൂത്തി എന്നിവയിൽ ചേർത്തും ഉപയോഗിക്കാം. ആവശ്യത്തിന് വെള്ളം കുടിക്കുന്നതും പ്രധാനമാണ്.
റാഗി, ചാമ, തിന, കമ്പ്, വരക് തുടങ്ങിയ ചെറുധാന്യങ്ങൾ പോഷകസമൃദ്ധമാണ്. ഫൈബർ, ധാതുക്കൾ തുടങ്ങിയവ ഇവയിൽ അടങ്ങിയിട്ടുണ്ട്. സാധാരണ അരിക്കൊപ്പം ഭക്ഷണക്രമത്തിൽ വൈവിധ്യം കൊണ്ടുവരാൻ ഇവ സഹായിക്കും. ദോശ, ഇഡലി, കഞ്ഞി, പുട്ട് തുടങ്ങിയവ തയ്യാറാക്കാൻ ചെറുധാന്യങ്ങൾ ഉപയോഗിക്കാം. ഒരേ ധാന്യം മാത്രം പതിവാക്കാതെ വിവിധ ധാന്യങ്ങൾ മാറിമാറി ഉപയോഗിക്കുന്നതാണ് നല്ലത്.
എളുപ്പത്തിൽ ലഭിക്കുന്ന പ്രോട്ടീൻ സമ്പന്നമായ ഭക്ഷണമാണ് മുട്ട. ശരീരത്തിന് ആവശ്യമായ പ്രോട്ടീൻ, വിറ്റാമിൻ ബി12, കോളിൻ തുടങ്ങിയ പോഷകങ്ങൾ ഇതിൽ അടങ്ങിയിട്ടുണ്ട്. പ്രഭാതഭക്ഷണത്തിലോ മറ്റ് ഭക്ഷണങ്ങളോടൊപ്പമോ മുട്ട ഉൾപ്പെടുത്താം. പുഴുങ്ങിയ മുട്ട, ഓംലെറ്റ്, മുട്ടക്കറി തുടങ്ങിയ രീതികളിൽ കഴിക്കാം. അധികം എണ്ണയും ഉപ്പും ചേർക്കാതെ തയ്യാറാക്കുന്നതാണ് ഉചിതം.
കാൽസ്യം, പ്രോട്ടീൻ എന്നിവയുടെ നല്ല ഉറവിടമാണ് തൈര്. ലൈവ് കൾച്ചറുകൾ അടങ്ങിയ തൈര് കുടലിൻ്റെ ആരോഗ്യത്തിനും ഗുണകരമാകാം. ഉച്ചഭക്ഷണത്തോടൊപ്പം തൈര് ഉൾപ്പെടുത്താം. പഴങ്ങൾക്കൊപ്പം ചേർത്തും കഴിക്കാം. പഞ്ചസാര ചേർത്ത ഫ്ലേവേർഡ് യോഗർട്ടിന് പകരം സാധാരണ തൈര് തിരഞ്ഞെടുക്കുന്നതാണ് നല്ലത്.
വീട്ടിൽ എപ്പോഴും പഴങ്ങളും പച്ചക്കറികളും ഉണ്ടായിരിക്കണം. ആപ്പിൾ, പേരയ്ക്ക, ഓറഞ്ച്, പപ്പായ, വാഴപ്പഴം തുടങ്ങിയ പഴങ്ങളും കാരറ്റ്, ബീറ്റ്റൂട്ട്, ചീര, വെള്ളരിക്ക, തക്കാളി തുടങ്ങിയ പച്ചക്കറികളും ഭക്ഷണത്തിൽ ഉൾപ്പെടുത്താം. വിറ്റാമിനുകൾ, ധാതുക്കൾ, ആന്റിഓക്സിഡന്റുകൾ, ഫൈബർ എന്നിവ ലഭിക്കാൻ ഇവ സഹായിക്കും. സീസണൽ പഴങ്ങളും പച്ചക്കറികളും തിരഞ്ഞെടുക്കുന്നതും നല്ലതാണ്. പഴച്ചാറുകളേക്കാൾ മുഴുവൻ പഴങ്ങൾ കഴിക്കുന്നതാണ് കൂടുതൽ ഉചിതം.
നട്സും വിത്തുകളും വായു കടക്കാത്ത പാത്രങ്ങളിൽ സൂക്ഷിക്കുക.
പയർവർഗങ്ങൾ ഈർപ്പം കടക്കാത്ത പാത്രങ്ങളിൽ സൂക്ഷിക്കുക.
പഴങ്ങളും പച്ചക്കറികളും കേടാകുന്നതിന് മുമ്പ് ഉപയോഗിക്കുക.
പാക്കറ്റ് ഭക്ഷണങ്ങൾ വാങ്ങുമ്പോൾ ഉപ്പ്, പഞ്ചസാര, കൊഴുപ്പ് എന്നിവയുടെ അളവ് പരിശോധിക്കുക.
പഴകിയതും പൂപ്പൽ ബാധിച്ചതുമായ ഭക്ഷണങ്ങൾ ഉപയോഗിക്കരുത്.
ഭക്ഷണത്തിൽ ആവശ്യത്തിന് വെള്ളവും ഫൈബറും ഉൾപ്പെടുത്തുക.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates