

സംവിധായകൻ അമൽ നീരദിന്റെ സിനിമകളോടുള്ള ഇഷ്ടത്തെക്കുറിച്ചും അദ്ദേഹത്തിന്റെ സംവിധാനത്തിൽ പുറത്തിറങ്ങിയ 'സാഗർ ഏലിയാസ് ജാക്കി'യിലെ ഐറ്റം സോങ്ങിനെക്കുറിച്ചും തുറന്നുപറഞ്ഞ് നടി ജ്യോതിർമയി. അമൽ നീരദിന്റെ സിനിമകളിൽ ഏറ്റവും പ്രിയപ്പെട്ടത് ഏതാണെന്ന് ചോദിച്ചാൽ ഒരു പേര് മാത്രം പറയാനാകില്ലെന്നാണ് താരം പറയുന്നത്.
അമൽ ചെയ്യുന്ന എല്ലാ പ്രൊജക്ടുകളും തനിക്ക് ഒരുപോലെ പ്രിയപ്പെട്ടതാണെന്നും അവയുടെ കുറ്റവും കുറവുകളും കണ്ടെത്താൻ ശ്രമിക്കാറില്ലെന്നും ജ്യോതിർമയി പറഞ്ഞു.'ബാച്ചിലർ പാർട്ടി ഡ്യൂക്സി'ന്റെ പ്രചാരണത്തിന്റെ ഭാഗമായി 24 ന്യൂസിന് നൽകിയ അഭിമുഖത്തിലായിരുന്നു ജ്യോതിർമയിയുടെ പ്രതികരണം.
"അമലിന്റെ സിനിമകളിൽ ഒന്നും എനിക്ക് ഏറ്റവും ഫേവറേറ്റ് എന്ന് പറയാൻ പറ്റില്ല. അമൽ ചെയ്യുന്ന എല്ലാ പ്രൊജക്ടുകളും എനിക്ക് പ്രിയപ്പെട്ടതാണ്. ഒരു രീതിയിലും അത് ചികഞ്ഞുചികഞ്ഞ് കുറ്റവും കുറവുകളും കണ്ടുപിടിക്കാറില്ല. അതിൽ ഞാൻ ബയസ്ഡ് ആണ്. അതിലൊരെണ്ണം ഫേവറേറ്റ് എന്ന് പറയാനില്ല. എല്ലാം എനിക്ക് ഫേവറേറ്റ് മൂവീസാണ്," ജ്യോതിർമയി പറഞ്ഞു.
അമൽ നീരദിന്റെ 'സാഗർ ഏലിയാസ് ജാക്കി'യിൽ താൻ അവതരിപ്പിച്ച ഐറ്റം സോങിനെക്കുറിച്ചും താരം അഭിമുഖത്തിൽ സംസാരിച്ചു. ചിത്രത്തിലെ 'ഓസാമ' എന്ന ഗാനത്തിലെ വേഷം അമലിനോട് നേരിട്ട് ചോദിച്ചുവാങ്ങിയതാണെന്നാണ് ജ്യോതിർമയിയുടെ വെളിപ്പെടുത്തൽ.
"അമൽ നീരദിനോട് ചോദിച്ചുവാങ്ങി ചെയ്ത റോളാണ് സാഗർ ഏലിയാസ് ജാക്കിയിലെ ഐറ്റം സോങ്. ഓസാമ സോങ്. അമൽ ഈ ചിത്രത്തിൽ ഐറ്റം സോങ് ചെയ്യുന്നെങ്കിൽ അത് ഞാൻ ചെയ്യട്ടേ എന്ന് ചോദിച്ച് വാങ്ങിയതാണ്," ജ്യോതിർമയി പറഞ്ഞു.
2009ൽ പുറത്തിറങ്ങിയ 'സാഗർ ഏലിയാസ് ജാക്കി റീലോഡഡ്' സംവിധാനം ചെയ്തത് അമൽ നീരദാണ്. ചിത്രത്തിലെ 'ഓസാമ' ഗാനത്തിലെ ജ്യോതിർമയിയുടെ പ്രകടനം അന്ന് ശ്രദ്ധ നേടിയിരുന്നു. 2015ലാണ് ജ്യോതിർമയിയും അമൽ നീരദും വിവാഹിതരായത്. അതേസമയം, അമൽ നീരദിന്റെ സംവിധാനത്തിൽ ഒരുങ്ങിയ 'ബാച്ചിലർ പാർട്ടി ഡ്യൂ' ആണ് ജ്യോതിർമയിയുടെ പുതിയ ചിത്രം.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates