മുഖം നോക്കാന്‍ കണ്ണാടി എടുക്കുമ്പോള്‍ ഇനി നാവ് കൂടി പരിശോധിക്കണം. കാരണം നാവിന്റെ സവിശേഷതകള്‍ നോക്കി നമ്മുടെ ആരോഗ്യാവസ്ഥ എങ്ങനെയെന്ന് പരിശോധിക്കാനാകും. പോഷകക്കുറവു മുതല്‍ രക്തയോട്ടം കുറയുന്നതു വരെ നാവ് പരിശോധിക്കുന്നതിലൂടെ തിരിച്ചറിയാന്‍ സാധിക്കും.

വെളുത്ത കോട്ടിങ്

നാവിന് പുറമെ വെളുത്ത നിറത്തിൽ കോട്ടിങ് കാണപ്പെടാറുണ്ടോ? ഇത് ബാക്ടീരിയ വളർച്ചയുടെ ലക്ഷണമാണ്. നിർജ്ജലീകരണം, ശുചിത്വമില്ലായ്മ, വായിലൂടെ ശ്വസിക്കുന്നത് ഇവയെല്ലാം നാവിൽ ഇത്തരത്തിലൊരു കോട്ടിങ് ഉണ്ടാകാൻ കാരണമാകാം. ഡയറ്റിൽ ഇഞ്ചി ചായ ഉൾപ്പെടുത്തുന്നത് ബാക്ടീരിയ ബാധ കുറയ്ക്കാൻ സഹായിക്കും. ഇഞ്ചി ഉമിനീർ ഉൽപാനത്തെ ഉത്തേജിപ്പിക്കുകയും നാവിൽ നിന്ന് വായിൽ നിന്ന് ദോഷകരമായ ബാക്ടീരിയകളെ പുറന്തള്ളാൻ സഹായിക്കുകയും ചെയ്യുന്നു.

ചെറിയ കുമിഴകൾ

നാവിൽ ഇടയ്ക്ക് ചുവന്ന ചെറിയ കുമിളകൾ അല്ലെങ്കിൽ കുത്തുകൾ വരുന്നതായി നിരീക്ഷിച്ചിട്ടുണ്ടോ? ഇത് ശരീരത്തിനുള്ളിലെ അമിതമായ ചൂടിനെയാകാം സൂചിപ്പിക്കുന്നത്. വളരെ ചൂടുള്ള ഭക്ഷണം കഴിക്കുമ്പോഴും നാവിൽ ഇത്തരത്തിൽ ചുവന്ന കുത്തുകൾ ഉണ്ടാകാം.

നാവിൽ നീര്

നാവിന് തെളിഞ്ഞ ചുവന്ന നിറം അല്ലെങ്കിൽ നീര് വെക്കുന്നത് ശരീരത്തിലെ ഇരുമ്പിന്റെ കുറവിനെ സൂചിപ്പിക്കാം. കൂടാതെ നാവിലേക്ക് ഓക്സിജൻ സഞ്ചാരം കുറയുന്നതും നാവിൽ നീര് വെക്കാൻ കാരണമായേക്കാം. ബീറ്റ്റൂട്ടും നെല്ലിക്കയും ഒരുമിച്ച് കഴിക്കുന്നത് ശരീരത്തിന്റെ ചുവന്ന രക്താണുക്കൾ ഉത്പാദിപ്പിക്കാനുള്ള കഴിവ് മെച്ചപ്പെടുത്തുകയും. കൂടാതെ ഹീമോഗ്ലോബിന്റെ അളവ് വർധിപ്പിക്കുകയും, ഇരുമ്പിന്റെ അഭാവം കുറയ്ക്കുകയും ചെയ്യും.

നീലകലർന്ന പർപ്പിൾ നിറം

ശരീരത്തിലെ രക്തയോട്ടം കുറയുന്നതിന്റെ സൂചനയായി നാവിന് നീലകലർന്ന പർപ്പിൾ നിറം ഉണ്ടാകാം. കൂടാതെ വായുടെ ശുചിത്വമില്ലായ്മ, വിറ്റാമിൻ ബി2ന്റെ കുറവും ഇതിന് കാരണമാകാം.

മിനുസമുള്ള നാവ്

പാപ്പില്ലെകളാണ് നാവിനെ പരുക്കനാക്കുന്നത്. ഇത് നശിക്കുന്നതുകൊണ്ട് നാവ് മിനുസമുള്ളതാകുന്നത്. ചില അവശ്യ പോഷകങ്ങളുടെ കുറവും പുവലിയുമാണ് നാവിലെ പാപ്പില്ലെകൾ നശിക്കാൻ കാണമാകുന്നത്.