കട്ടൻ ചായ മിക്കവാറും ആളുകളുടെ ഒരു ശീലത്തിന്റെ ഭാ​ഗമാണ്. എന്നാൽ ശീലത്തിനപ്പുറം കട്ടൻ ചായ നമ്മുടെ ഹൃദയത്തെയും ആരോ​ഗ്യത്തോടെ സംരക്ഷിക്കുമെന്ന് ​പഠനങ്ങൾ ചൂണ്ടിക്കാണിക്കുന്നു. ഇതിൽ അടങ്ങിയ ഫ്ലേവനോയ്ഡുകൾ ഹൃദയാരോ​ഗ്യത്തെ മെച്ചപ്പെടുത്താനും ഹൃദ്രോഗ സാധ്യത കുറയ്ക്കുകയും ചെയ്യും.

ആന്റിഓക്സിഡന്റുകളുടെ ഒരു കലവറയാണ് നമ്മുടെ കട്ടൻ ചായ. ബ്ലാക്ക് ടീയിലെ ആന്‍റിഓക്‌സിഡന്‍റുകളുടെ പ്രധാന സ്രോതസ്സുകളാണ് കാറ്റെച്ചിൻസ്, തേഫ്‌ലാവിൻ, തേറൂബിജിൻസ് എന്നിവയുൾപ്പെടെയുള്ള പോളിഫെനോളുകളുടെ ഗ്രൂപ്പുകൾ. ഇത് മൊത്തത്തിലുള്ള ആരോ​ഗ്യം മെച്ചപ്പെടുത്താൻ സഹായിക്കുന്നതാണ്.

2022 നവംബറിൽ ആർട്ടീരിയോസ്ക്ലെറോസിസ്, ത്രോംബോസിസ്, വാസ്കുലർ ബയോളജി എന്നിവയിൽ പ്രസിദ്ധീകരിച്ച പഠനങ്ങളിൽ ഫ്ലേവനോയിഡ് അടങ്ങിയ ഭക്ഷണപാനീയങ്ങൾ പതിവായി കഴിക്കുന്ന ആളുകൾക്ക് ആരോ​ഗ്യകരമായ രക്തക്കുഴലുകൾ ഉണ്ടാകുമെന്നും, പ്രത്യേകിച്ച് പ്രായമാകുമ്പോൾ ആർട്ടറി കാൽസിഫിക്കേഷൻ സാധ്യത കുറവാണെന്നും കണ്ടെത്തിയിരുന്നു.

ഫ്ലേവനോയിഡുകളുടെ ​ഗുണങ്ങൾ

ഫ്ലേവനോയിഡുകൾ ശരീരത്തിലെ വീക്കം, ഓക്സിഡേറ്റീവ് സമ്മർദം എന്നിവ കുറയ്ക്കുന്നതിനാൽ ഇത് ഹൃദ്രോ​ഗം, പക്ഷാഘാതം എന്നിവയ്ക്കുള്ള സാധ്യത കുറയ്ക്കുന്നു. ചായ തീർത്തു കുടിക്കാത്തവരെ അപേക്ഷിച്ച്, ഒരു ദിവസം രണ്ട് മുതൽ ആറ് കപ്പ് കട്ടൻ ചായ കുടിക്കുന്ന സ്ത്രീകളിൽ ധമനികളിൽ കാൽസിഫിക്കേഷൻ ഉണ്ടാകാനുള്ള സാധ്യത 16-42 ശതമാനം കുറവാണെന്ന് കണ്ടെത്തി.

ഫ്ലേവനോയ്ഡുകൾ അടങ്ങിയ മറ്റ് ഭക്ഷണങ്ങൾ

ആപ്പിൾ, ഓറഞ്ച്, ചോക്ലേറ്റ്, റെഡ് വൈൻ, ബ്രോക്കോളി, കോളിഫ്ലവർ, കാബേജ്, കാലെ പോലുള്ള ക്രൂസിഫറസ് പച്ചക്കറികളിലും ഫ്ലേവനോയിഡുകൾ ധാരാളം അടങ്ങിയിട്ടുണ്ട്.