മാറിമറിയുന്ന ജീവിതശൈലികൾ നമ്മൾ പോലും അറിയാതെ നമ്മുടെ ഹൃദയാരോ​ഗ്യത്തെ വലിയ രീതിയിൽ ബാധിക്കുന്നു. നിസാരമെന്ന് കരുതി അവ​ഗണിക്കുന്ന ശീലങ്ങൾ കാലക്രമേണ നിങ്ങളെ ഒരു ഹൃദ്രോ​ഗിയാക്കിയേക്കാം. ലോകത്തിൽ തന്നെ ഏറ്റവും കൂടുതൽ മരണങ്ങൾ ഉണ്ടാകാനുള്ള ഒരു പ്രധാന കാരണമാണ് ഹൃദ്രോ​ഗങ്ങൾ. അതുകൊണ്ട് തന്നെ ഹൃദയാരോ​ഗ്യത്തെ കുറിച്ചുള്ള അവബോധം ഇന്ന് വളരെ പ്രധാനമാണ്.

ഹൃദയാരോഗ്യം മെച്ചപ്പെടാന്‍ ഭാരിച്ച വര്‍ക്ക്ഔട്ടുകളുടെയോ കര്‍ശന ഡയറ്റിന്റെയോ ആവശ്യമില്ലെന്ന് പ്രമുഖ കാര്‍ഡിയോളജിസ്റ്റ് ആയ ഡോ. അലോക് ചോപ്ര പറയുന്നു. ആരോ​ഗ്യകരമായ ഒരു ജീവിതശൈലി പിന്തുടരുകയാണ് ഏറ്റവും പ്രധാനം അതിനൊപ്പം ചില ദുശ്ശീലങ്ങൾ ഒഴിവാക്കുകയും വേണം.

ഈ അഞ്ച് അബദ്ധങ്ങൾ ഒഴിവാക്കാം

വാപ്പിങ്: ജെൻ സി-ക്കിടയിൽ ഇപ്പോൾ ട്രെൻഡിങ് ആണ് വാപ്പിങ്. അതായത്, ഇ- സി​ഗരറ്റിന് സമാനമായ രീതിയിൽ ഉപയോ​ഗിക്കുന്ന ഇത് പുകവലിയേക്കാൾ മോശമാണെന്ന് അദ്ദേഹം പറയുന്നു. നാഷണൽ ഹെൽത്ത് ഇൻസ്റ്റിറ്റ്യൂട്ടിന്റെ പഠനം പ്രകാരം, ശ്വാസകോശ പ്രവർത്തനത്തിലും ഹൃദയ പ്രവർത്തനത്തിലും പുകവലിക്ക് സമാനമായ ഫലങ്ങൾ വാപ്പിങ് ഉണ്ടാക്കുന്നതായി കണ്ടെത്തിയിട്ടുണ്ട്.

മദ്യത്തിന്റെ ഉപയോഗം: മദ്യത്തിന് ഒരു സുരക്ഷിതമായ അളവില്ല. നിർബന്ധമാണെങ്കിൽ ആഴ്ചയിൽ ഒന്നോ രണ്ടോ തവണയായി ചുരുക്കുക. അമിതമായ മദ്യപാനം ഒഴിവാക്കുന്നതാണ് നല്ലത്. റെഡ് വൈനും വൈറ്റ് വൈനുമാണ് മികച്ച ഓപ്ഷനുകൾ എന്നും അദ്ദേ​ഹം പറയുന്നു.

നോൺ-സ്റ്റിക്ക് പാനുകൾ: നോൺ-സ്റ്റിക്ക് പാനുകൾ ദീർഘനേരം ഉപയോഗിക്കരുതെന്ന് അദ്ദേഹം മുന്നറിയിപ്പ് നൽകുന്നു. നോൺ-സ്റ്റിക്ക് പാനുകളുടെ കോട്ടിങ് തകർന്നാൽ അത് ആരോ​ഗ്യത്തിന് വളരെ അധികം ദോഷം ചെയ്യും.

രണ്ടു നേരം ഭക്ഷണം: ഇക്കാലത്ത് ജിമ്മിൽ പോകുന്ന പലരും ആറ് നേരം ഭക്ഷണം കഴിക്കുന്നത് നല്ലതാണെന്ന് ചിന്തിക്കുന്നു. എന്നാൽ എത്ര തവണ നിങ്ങൾ ഭക്ഷണം കഴിക്കുന്നുവോ അത്രയും അളവിൽ നിങ്ങളുടെ ശരീരത്തിൽ കൊഴുപ്പ് അടിഞ്ഞു കൂടുന്നു. അതുകൊണ്ട് രണ്ട് നേരം ഭക്ഷണം കഴിക്കുന്നതാണ് മികച്ചത്.

അല്ലുലോസ്: പഞ്ചസാരയ്ക്ക് നല്ലൊരു ബദലായി അല്ലുലോസ് ഇപ്പോൾ അധികം ആളുകളും കണക്കാക്കുന്നു. ടേബിൾ ഷുഗറിൽ നിന്നാണ് അല്ലുലോസ് നിർമിക്കുന്നത്. അത് പഞ്ചസാരയെക്കാൾ മികച്ചതാണ്. എന്നാൽ പോർഷൻ നിയന്ത്രിക്കേണ്ടത് പ്രധാനമാണ്.