ഓണത്തിന് ഇലയിൽ ഉപ്പ് കഴിഞ്ഞാൽ സ്ഥാനം ഉപ്പേരിക്കാണ്, അതായത് കായവറുത്തത്, ശർക്കരവരട്ടി തുടങ്ങിയവ. സദ്യയ്ക്ക് അല്ലെങ്കിലും വൈകുന്നേര ചായയ്ക്കൊപ്പം സ്നാക് ആയും കായവറുത്തത് കഴിക്കുന്ന ശീലം നമുക്കുണ്ട്. എന്നാൽ വീട്ടിൽ ഉണ്ടാക്കാൻ ശ്രമിച്ചാൽ കടയിലെ പോലെ ക്രിസ്പി ആയി കിട്ടണമെന്നില്ല. ഒന്നുകിൽ എണ്ണ കൂടുതൽ വലിച്ചെടുക്കും അല്ലെങ്കിൽ ഒട്ടിപ്പിടിക്കും. ശരിയായ രീതിയിലാണെങ്കിൽ നിങ്ങൾക്കും നല്ല ക്രിസ്പി കായവറുത്തത് ഉണ്ടാക്കാം.

ആരോ​ഗ്യ വാർത്തകൾ കൂടുതൽ അറിയാൻ വാട്സാപ്പ് ഗ്രൂപ്പിൽ അംഗമാകൂ.

ഇവിടെ ക്ലിക്ക്  ചെയ്യുക

വറുക്കാൻ കായ തിരഞ്ഞെടുക്കുമ്പോൾ

നല്ല കായ വറുത്തത് ലഭിക്കാൻ പച്ചക്കായ തിരഞ്ഞെടുക്കുന്നതാണ് ഏറ്റവും നല്ലത്. പൂർണമായും പച്ചനിറമുള്ളതും അധികം പഴുക്കാത്തതുമായ നേന്ത്രക്കായയാണ് ഇതിനായി അനുയോജ്യം. കായ വളരെ ഇളം പ്രായത്തിലുള്ളതാണെങ്കിൽ വറുത്ത ശേഷം നല്ല ക്രിസ്പിനസ് ലഭിക്കണമെന്നില്ല. അതേസമയം കായ പഴുക്കാൻ തുടങ്ങിയതാണെങ്കിൽ വറുത്തപ്പോൾ നിറവും രുചിയും മാറാം.

കായ അരിയുമ്പോൾ ശ്രദ്ധിക്കേണ്ടത്

കായ വളരെ കട്ടിയിലും വളരെ നേർത്തതിലും അരിയരുത്. ഒരേ കനത്തിൽ അരിഞ്ഞെടുക്കുന്നതാണ് നല്ലത്. കഷ്ണങ്ങൾക്ക് കനം വ്യത്യാസപ്പെട്ടാൽ ചിലത് പെട്ടെന്ന് കരിഞ്ഞുപോകാനും ചിലത് സോഫ്റ്റ് ആകാനും സാധ്യതയുണ്ട്. അരിഞ്ഞ ഉടൻ എണ്ണയിലേക്ക് ഇടുന്നതിനേക്കാൾ കഷ്ണങ്ങളിലെ അധിക ഈർപ്പം ഇല്ലെന്ന് ഉറപ്പാക്കണം.

വെള്ളം ഉപയോഗിച്ച് കഴുകിയിട്ടുണ്ടെങ്കിൽ വൃത്തിയുള്ള തുണി ഉപയോഗിച്ച് നന്നായി തുടയ്ക്കുക. വെള്ളത്തിന്റെ സാന്നിധ്യം കായയുടെ ക്രിസ്പിനസിനെ ബാധിക്കും.

എണ്ണയുടെ ചൂട് വളരെ പ്രധാനമാണ്

കായ വറുക്കുമ്പോൾ എണ്ണ ശരിയായ ചൂടിലായിരിക്കണം. എണ്ണ തീരെ തണുത്തതാണെങ്കിൽ കായ കൂടുതൽ എണ്ണ കുടിക്കും. എണ്ണ വളരെ ചൂടായാൽ പുറംഭാഗം പെട്ടെന്ന് കരിയുകയും ഉള്ളിൽ വേണ്ടത്ര ക്രിസ്പിയാകാതിരിക്കുകയും ചെയ്യും.

ഇടത്തരം ചൂടിലാണ് കായ വറുക്കേണ്ടത്. ചെറിയൊരു കഷ്ണം എണ്ണയിലേക്ക് ഇട്ട് നോക്കുമ്പോൾ മിതമായ രീതിയിൽ പൊങ്ങിവരുന്നുണ്ടെങ്കിൽ എണ്ണയുടെ ചൂട് ശരിയായ അളവിലാണെന്ന് മനസ്സിലാക്കാം.

ഒരേസമയം അധികം കായ ഇടരുത്

ചട്ടിയിൽ ഒരേസമയം വളരെ അധികം കഷ്ണങ്ങൾ ഇടുന്നത് എണ്ണയുടെ ചൂട് പെട്ടെന്ന് കുറയാൻ കാരണമാകും. ഇതോടെ കായ കൂടുതൽ എണ്ണ ആഗിരണം ചെയ്ത് ക്രിസ്പിയാകാതെ പോകാം. അതിനാൽ ചെറിയ ബാച്ചുകളായി വറുത്തെടുക്കുന്നതാണ് നല്ലത്.

ഉപ്പുവെള്ളം എപ്പോൾ ചേർക്കണം?

ഒരു കപ്പ് വെള്ളത്തിൽ ആവശ്യത്തിന് ഉപ്പും അല്പം മഞ്ഞൾപ്പൊടിയും ചേർത്ത് തയ്യാറാക്കാം. കായ വറുത്ത് പാകമാകുമ്പോൾ ഇത് വളരെ ശ്രദ്ധയോടെ അല്പം മാത്രം തളിക്കാം. വെള്ളം ചേർത്ത ശേഷം എണ്ണ തെറിക്കാൻ സാധ്യതയുള്ളതിനാൽ ശ്രദ്ധിക്കണം.

ക്രിസ്പിയായി വറുക്കാനുള്ള പ്രധാന ടിപ്പ്

കഷ്ണങ്ങൾ എണ്ണയിൽ ഇട്ട ഉടൻ നിരന്തരം ഇളക്കേണ്ടതില്ല. ആദ്യം ഒരു ഭാഗം അല്പം വറുത്തശേഷം സാവധാനം ഇളക്കുക. കഷ്ണങ്ങൾ ഒരുമിച്ച് ഒട്ടിപ്പിടിക്കാതെ എണ്ണയിൽ നന്നായി വറുത്തെടുക്കണം.

വറുത്തശേഷം കഷ്ണങ്ങൾക്ക് നല്ല പൊൻനിറവും കട്ടിയുള്ള ക്രിസ്പി ടെക്സ്ചറും ലഭിച്ചാൽ എണ്ണയിൽ നിന്ന് കോരിയെടുക്കാം. ആവശ്യത്തിലധികം വറുത്താൽ കായയുടെ സ്വാഭാവിക രുചി നഷ്ടപ്പെടുകയും കയ്പ്പോ കരിഞ്ഞ രുചിയോ ഉണ്ടാകുകയും ചെയ്യും.

വറുത്തശേഷം എന്ത് ചെയ്യണം?

വറുത്തെടുത്ത കായക്കഷ്ണങ്ങൾ ഉടൻ വായു കടക്കാത്ത പാത്രത്തിൽ അടച്ചുവയ്ക്കരുത്. ആദ്യം ഒരു പേപ്പർ ടവലിലോ വൃത്തിയുള്ള തുണിയിലോ പരത്തി അധിക എണ്ണ നീക്കം ചെയ്യണം. ശേഷം പൂർണമായും തണുത്തശേഷം മാത്രമേ വായു കടക്കാത്ത പാത്രത്തിലേക്ക് മാറ്റാവൂ. ചൂടുള്ള കായ വറുത്തത് അടച്ചുപൂട്ടിയ പാത്രത്തിൽ സൂക്ഷിച്ചാൽ അതിനുള്ളിൽ ഈർപ്പം രൂപപ്പെടുകയും കായ മൃദുവാകുകയും ചെയ്യും.