തേങ്ങ ചേര്‍ക്കാത്ത കറികള്‍ മലയാളികള്‍ക്ക് വിരളമാണ്. എന്നാല്‍ നാട്ടില്‍ നിന്ന് മാറി നില്‍ക്കുന്ന മലയാളികള്‍ക്ക് ദിവസവും നാളികേരം ചേര്‍ത്തുള്ള കറികള്‍ വീട്ടിലുണ്ടാക്കുന്ന ശ്രമകരമാണ്. നാളികേരം ഫ്രഷ് ആയി സൂക്ഷിക്കുന്നതാണ് പ്രധാന വെല്ലുവിളിയാകുന്നത്. തേങ്ങ പൊട്ടിക്കലും ചിലകലും സൂക്ഷിക്കലുമൊക്കെ പ്രയാസമായി തോന്നാം. എന്നാല്‍ തേങ്ങ ചിരകിയതായാലും തേങ്ങ വെള്ളവുമൊക്കെ കേടുകൂടാതെ ദിവസങ്ങളോളം സൂക്ഷിക്കാന്‍ ചില മാര്‍ഗങ്ങളുണ്ട്.

തേങ്ങ വെള്ളം

അധികം പുളിക്കാത്ത തേങ്ങ വെള്ളം ഫ്രഷായി എടുത്ത ശേഷം വായു കടക്കാത്ത ഒരു ഗ്ലാസ് കുപ്പിയില്‍ ഫ്രിഡ്ജില്‍ സൂക്ഷിക്കാവുന്നതാണ്. 24 മുതൽ 48 മണിക്കൂർ വരെ ഇത് ഫ്രഷ് ആയി ഇരിക്കും. ദീർഘകാലത്തേക്കാണെങ്കിൽ ഐസ് ട്രേകളിൽ ഫ്രീസ് ചെയ്ത് രണ്ട് മാസം വരെ സൂക്ഷിക്കാം. ഇത് ജ്യൂസിലോ സ്മൂത്തികളിലോ ഉപയോഗിക്കാവുന്നതാണ്.

കൊപ്ര

ചിരട്ടയില്‍ നിന്ന് ഇളക്കിയെടുക്കുന്ന അധികം ഉണങ്ങാത്ത തേങ്ങ, വായു കടക്കാത്ത പാത്രത്തിലോ റീസീലബിൾ ബാഗിലോ ഫ്രിഡ്ജിൽ സൂക്ഷിക്കാവുന്നതാണ്. അഞ്ച് മുതൽ ഏഴ് ദിവസം വരെ പുതുമയോടെ സൂക്ഷിക്കാൻ ഇതിലൂടെയാകും. കഷണങ്ങളാക്കിയും ഫ്രീസർ ബാഗുകളിൽ സൂക്ഷിക്കാം. 5- 6 മാസം വരെ ഇവ നിലനിൽക്കും.

ചിരകിയ തേങ്ങ

ചിരകിയ തേങ്ങ വായു കടക്കാത്ത പാത്രത്തിൽ ഫ്രിഡ്ജിൽ നാല്-അഞ്ച് ദിവസം വരെ സൂക്ഷിക്കാവുന്നതാണ്.

തേങ്ങാ പാൽ

വീട്ടിൽ തയ്യാറാക്കിയ തേങ്ങാ പാൽ വായു കടക്കാത്ത പാത്രത്തിൽ ഫ്രിഡ്ജിൽ 3-4 ദിവസം വരെ സൂക്ഷിക്കാം. ഉപയോഗിക്കുന്നതിന് മുമ്പ് നന്നായി ഇളക്കാൻ ശ്രദ്ധിക്കാം. ദീർഘനാളത്തെ ഉപയോഗത്തിന് ഫ്രീസ് ചെയ്ത് ഉപയോഗിക്കാം. ഐസ് ട്രേകളിൽ ഒഴിച്ച് ഫ്രീസ് ചെയ്ത് ശേഷം ഇവ ഫ്രീസർ ബാഗിലേക്ക് മാറ്റി 2-3 മാസം വരെ സൂക്ഷിക്കാം. തണുപ്പ് മാറ്റിയ ശേഷം ഇളക്കി ഉപയോഗിക്കാം.