വളരെ നിശബ്ദമായി നമ്മുടെ ആരോഗ്യത്തെ കാർന്നുതിന്നുന്ന ചില ശീലങ്ങളുണ്ട്. അതിൽ പ്രധാനമാണ് പുകവലി. പുകവലി ശരീരത്തിലെ ഓരോ അവയവത്തെയും തകരാറിലാക്കും. അത് തിരിച്ചറിയുമ്പോഴേക്കും കാര്യങ്ങൾ കൈവിട്ടു പോയിട്ടുണ്ടാവുകയും ചെയ്യും.

ലോകമെമ്പാടുമുള്ള ഒന്നിലധികം പഠനങ്ങളിൽ നിന്നുള്ള കണ്ടെത്തലുകൾ വിശകലനം ചെയ്ത അവലോകനത്തിൽ, പുകവലി ശ്വസന രോഗങ്ങൾ, ഹൃദയ സംബന്ധമായ പ്രശ്നങ്ങൾ, പ്രത്യുൽപാദന പ്രശ്നങ്ങൾ, നിരവധി അർബുദങ്ങൾ എന്നിവയ്ക്ക് കാരണമാകുമെന്ന് കണ്ടെത്തി. സിഗരറ്റിലെ രാസവസ്തുക്കൾ രക്തക്കുഴലുകളെ തകരാറിലാക്കുകയും രക്തത്തിലെ ഓക്സിജൻ അളവു കുറയ്ക്കുകയും ഹൃദയത്തിന് വലിയ സമ്മർദ്ദം ചെലുത്തുകയും ചെയ്യുന്നു.

ഒരു സി​ഗരറ്റ് ഒരു വ്യക്തിയുടെ ആയുസിന്‍റെ ഏകദേശം 20 മിനിറ്റ് കുറയ്ക്കുമെന്നാണ് മുൻപഠനങ്ങൾ തെളിയിക്കുന്നത്. പുകവലി പ്രാഥമികമായി ഒരാളുടെ ആരോഗ്യകരമായ മധ്യവർഷങ്ങളെയാണ് ബാധിക്കുക. ഏത് പ്രായത്തിലും പുകവലി ഉപേക്ഷിക്കുന്നത് ദീർഘകാല ആരോഗ്യ ഗുണങ്ങൾ നൽകുമെന്ന് പഠനം വ്യക്തമാക്കുന്നു.

ആഗോളതലത്തില്‍ ഏതാണ്ട് 80 ലക്ഷത്തോളം ആളുകളുടെ ജീവനാണ് ഓരോ വര്‍ഷവും പുകയില കവരുന്നതെന്നാണ് ലോകാരോഗ്യ സംഘടനയുടെ കണക്കുകള്‍. ഇതില്‍ 70 ലക്ഷത്തോളം ആളുകള്‍ മരിക്കുന്നത് നേരിട്ട് പുകയില ഉപയോഗത്തിന്‍റെ ഫലമായാണ്. അതേസമയം, 13 ലക്ഷത്തോളം ആളുകള്‍ പുകയില നേരിട്ട് ഉപയോഗിക്കാതെയുമാണ്. 

പുകവലി ബാധിക്കുന്ന പ്രധാന അവയവങ്ങളും രോഗങ്ങളും

• ശ്വാസകോശവും ശ്വാസനാളവും: ശ്വാസകോശ അർബുദം (Lung Cancer), സിഒപിഡി (COPD), ബ്രോങ്കൈറ്റിസ്, എംഫിസെമ, ആസ്ത്മ എന്നിവയ്ക്ക് കാരണമാകുന്നു.

• ഹൃദയവും രക്തക്കുഴലുകളും: ഹൃദയാഘാതം (Heart Attack), സ്ട്രോക്ക് (Stroke), രക്തസമ്മർദ്ദം, രക്തയോട്ടം കുറയൽ എന്നിവയ്ക്ക് കാരണമാകുന്നു.

• വായ, തൊണ്ട, അന്നനാളം: വായ, തൊണ്ട, അന്നനാളം എന്നിവിടങ്ങളിലെ അർബുദം, പല്ല് ദ്രവിക്കൽ, മോണരോഗങ്ങൾ എന്നിവയ്ക്ക് കാരണമാകാം.

• ദഹനവ്യവസ്ഥ: വയറുവേദന, ദഹനക്കുറവ്, പെപ്റ്റിക് അൾസർ, ആമാശയ കാൻസർ, പാൻക്രിയാറ്റിക് കാൻസർ, കരൾ രോഗങ്ങൾ എന്നിവയ്ക്ക് കാരണമാകുന്നു.

• പ്രത്യുൽപാദന വ്യവസ്ഥ: വന്ധ്യത, പുരുഷന്മാരിൽ ഉദ്ധാരണക്കുറവ്, സ്ത്രീകളിൽ യോനീ വരൾച്ച, ഗർഭകാല സങ്കീർണ്ണതകൾ എന്നിവയ്ക്ക് കാരണമാകും.

• വൃക്ക/മൂത്രാശയ കാൻസർ, മാക്യുലർ ഡീജനറേഷൻ (കാഴ്ചക്കുറവ്), ഓസ്റ്റിയോപൊറോസിസ് (എല്ലുകളുടെ ബലഹീനത), അകാല വാർദ്ധക്യം, മുടികൊഴിച്ചിൽ എന്നിവയ്ക്ക് കാരണമാകുന്നു.

പുകവലി ഒഴിവാക്കാന്‍ സിമ്പിള്‍ ടിപ്സ്

• പുകവലി ഉപേക്ഷിക്കാന്‍ കൃത്യമായ ഒരു കാരണം കണ്ടെത്തണം; ഒഴിച്ചുകൂടാനാവാത്ത വിധം പലരുടെയും ശീലത്തിന്‍റെ ഭാഗമാണ് പുകവലി. അതില്‍ നിന്നും ഒഴിവാകണമെങ്കില്‍ നിങ്ങളെ പിടിച്ചു നിര്‍ത്തുന്ന ഒരു കാരണം കണ്ടെത്തണം. അത് ഒരുപക്ഷേ നിങ്ങളുടെ കുടുംബമാകാം, പഠനമാകാം.

• പുകവലിയെ പ്രോത്സാഹിപ്പിക്കുന്ന സാഹചര്യം ഒഴിവാക്കുക; ഭക്ഷണം കഴിച്ചു കഴിഞ്ഞാല്‍ ഇല്ലെങ്കില്‍ എന്തെങ്കിലും സമ്മര്‍ദ്ദം തോന്നിയാല്‍ ചുണ്ടില്‍ ഒരു സിഗരറ്റ് കത്തിച്ചുവെക്കണം. എന്നാല്‍ അത്തരം സാഹചര്യങ്ങളില്‍ മാറി ചിന്തിക്കാന്‍ തയ്യാറാകണം. പുകവലിക്കാന്‍ തോന്നുമ്പോള്‍ മിഠായി എല്ലെങ്കില്‍ ചൂയിങ് ഗം ഉപയോഗിക്കാം.

• ഇത് അവസാനത്തേത്; നിര്‍ത്തുന്നതിന് മുന്‍പ് ഒരിക്കല്‍ കൂടി പുകവലിച്ചേക്കാം എന്ന് കരുതി വീണ്ടും വലിക്കരുത്. അത് നിങ്ങളെ വീണ്ടും വീണ്ടും പുകവലിക്കാന്‍ പ്രേരിപ്പിക്കും.